Մոսկվայում մարտի 5-6-ը կայացել է «Լազարյան ակումբ»-ի 2-րդ համաժողովը՝ «Էկոնոմիկա, ներդրում, ինտեգրացիա. Ռուսաստանի և Հայաստանի միջև տնտեսական կապերի զարգացման հեռանկարները» թեմայով:
ԱԺ «Լուսավոր Հայաստան» խմբակցության պատգամավոր, ԱՊՀ պառլամենտական ասամբլեայի մշտական անդամ, ԱԺ տնտեսական հարցերի մշտական հանձնաժողովի անդամ Արկադի Խաչատրյանը, ով համաժողովի մասնակիցների թվում էր, «Առաջին լրատվական»-ի հետ զրույցում նշեց, որ այս համաժողովին մասնակցելու հրավեր են ստացել խորհրդարանական բոլոր խմբակցությունները և Կառավարությունը, ինչպես նաև ՀՀ նախագահը և վարչապետը:
Ակումբի անդամները ներկայացրել են Ռուսաստանի ու Հայաստանի համագործակցության տարբեր ոլորտների վերաբերյալ իրենց առաջարկները և նախագծերը: Ա. Խաչատրյանի խոսքով՝ ակումբում ոչ թե կոնկրետ մի հարց է դրվում և դրա վերաբերյալ կարծիքներ են հնչում, այլ նաև «Ազատ ամբիոն»- ի շրջանակում խոսքի իրավունք է տրվում բոլոր ցանկացողներին, ցանկացած թեմայով: Մեր խմբակցության կողմից ներկայացրել եմ հարցադրումներ ԵԱՏՄ գործունեության արդյունավետության բարձրացման և Ռուսաստանի հետ մեր հարաբերությունների տնտեսական ներուժի ամբողջական իրացման վերաբերյալ:
Ա. Խաչատրյանի խոսքով՝ Լազարյան ակումբում Հայաստանին առնչվող մի շարք հարցեր են քննարկվել, որոնցից է ԵԱՏՄ անդամ երկրների տրանսպորտային ենթակառուցվածքների զարգացումն ու ինտեգրումը. «Հայաստանը չունի ընդհանուր սահման ԵԱՏՄ անդամ այլ երկրների հետ, հետևաբար այլընտրանքային և դիվերսիֆիկացված տրանսպորտային հաղորդակցության ստեղծումը չափազանց կարևոր է մեզ համար… Քննարկվել է նաև էներգետիկ միասնական շուկայի ստեղծման հարցը: Շատ կարևոր է այդ զգայուն հարցի՝ էներգառեսուրսների ոչ խտրական գնագոյացման հարցի լուծումը… Անդրադարձ է կատարվել նաև երկաթուղային ինտեգրացիային…»:
Մանրամասն՝ տեսանյութում:
