Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը հարցազրույց է տվել «Regnum» գործակալությանը՝ անդրադառնալով ԵԱՏՄ շրջանակում գազի, նավթի ու նավթամթերքի ընդհանուր շուկաների ստեղծման ֆոնին գազի գնի նվազման հավանականության հարցին:
Ըստ Տիգրան Սարգսյանի՝ գազի, նավթի և նավթամթերքի ընդհանուր շուկաների ստեղծման գործընթացը բավականին լուրջ քայլ է դեպի առաջ, սակայն դժվար է առաջ գնում, քանի որ կան մի շարք վիճելի հարցեր․ դրանցից մեկը գազի տարանցման համար գին ձևավորելու խնդիրն է:
«Հարցը պետք է լուծենք արդեն 2019 թվականին: Բոլոր երկրներն էլ հետաքրքրված են, որ գազի տարանցիկ գինը նվազագույն լինի, և գազի գինը հավասար մրցակցային պայմանների ստեղծման հնարավորություն ընձեռելուն:
Գազի ընդհանուր շուկայի ձևավորման՝ 2016 թ. մայիսին հատատված հայեցակարգի համաձայն՝ ԵԱՏՄ շրջանակում նախատեսված է գազի բորսային առևտուր: Այսինքն՝ դրա գինը ձևավորվելու է շուկայի հիմնական սկզբունքներից ելնելով:
Շուկայական գնագոյացմանն անցումը, այդ թվում՝ ընդհանուր շուկայում գազի բորսային առևտրի ստեղծումը, և ոչ խտրական հիմքով գազի տարանցման սակագների ձևավորումը կնպաստի շուկայի մասնակիցների թվի ավելացմանն ու սպառողների համար գազի գնի կայունացմանը», – ասել է Տիգրան Սարգսյանը, ինչպես նաև կանխատեսել միության անդամ պետություններում գազիֆիկացման մակարդակի, ինչպես նաև գազի սպառման ծավալի աճ:
Նա նաև նշել է, որ ԵԱՏՄ շրջանակում գազի, նավթի և նավթամթերքի, ինչպես նաև էլեկտրաէներգիայի ընդհանուր շուկաների ձևավորումը կհանգեցնի արդյունավետության բարձրացման, ինչը նշանակում է, որ անարդյունավետ ընկերությունները դուրս կմնան շուկայից: ԵԱՏՀ կոլեգիայի նախագահը գործակալությանն ասել է, որ դրան պետք է նախապատրաստվել, ուստի ազգային կառավարությունները պետք է արդեն այսօր մտածեն այն մասին՝ ինչ մեխանիզմներով պետք է իրագործել այդ ամենն անցավ դարձնելու համար։
