Մեկնարկել է ՀՀ վարչապետ Նիկոլ Փաշինյանի պաշտոնական այցը Բրյուսել: ԱԺ եվրոպական ինտեգրման հարցերով հանձնաժողովի նախագահ Արման Եղոյանը «Առաջին լրատվական»-ի հետ զրույցում տեղեկացրեց, որ այցի ընթացքում նախատեսվում են երեք առանցքային հանդիպումներ՝ Եվրահանձնաժողովի ղեկավար պարոն Յունկերի, Եվրախորհրդի ղեկավար պարոն Տուսկի և ԵՄ արտաքին հարաբերությունների և անվտանգության հարցերով հանձնակատար Ֆեդերիկա Մոգերինիի հետ. «Սպասվում է նաև վարչապետի ելույթը Եվրախորհրդարանի արտաքին հարաբերությունների հանձնաժողովում»:
Մեր զրուցակցի խոսքով՝ այս օրակարգից դատելով՝ խոսքը գնալու է հարաբերությունները ավելի առարկայական դարձնելու, անցյալ տարի ձեռք բերված պայմանավորվածությունները ավելի գործնական հունի մեջ դնելու մասին. «Չեմ բացառում նաև, որ գործնական խոսակցություն ծավալվի ԵՄ-Հայաստան համաձայնագրի կիրարկման քայլերի հետ կապված»:
Արման Եղոյանը նշեց. «Այցի արդյունքներով կարող ենք տեսնել, թե ինչպես դա կարող ենք կորելացնել խորհրդարանական աշխատանքի հետ և համաձայնագրի կիրարկման վրա ինչպես կարող ենք պրոյեկտել»:
Հարցազրույցն ամբողջությամբ՝ տեսանյութում:
