ԲՀԿ 7-րդ համագումարին ներկա էր նաև Վայոց ձորի նախկին մարզպետ, ԲՀԿ-ական Սերգո Բագրատյանը, ում մարզպետի պաշտոնում փոխարինեց ՀՀԿ-ական Էդգար Ղազարյանը: Մարզպետի հրաժարականից հետո Հատուկ քննչական ծառայությունում սկսեց քննվել Սերգո Բագրատյանի և մի քանի համայնքների ղեկավարների կողմից պաշտոնեական դիրքը չարաշահելու և առանձնապես խոշոր չափերով հափշտակություն կատարելու դեպքի առթիվ հարուցված քրեական գործը: Բայց, ինչպես Բագրատյանին, այնպես էլ մյուս համայնքապետերին հաջողվեց ջրից չոր դուրս գալ: ԲՀԿ համագումարից հետո այս և մի քանի այլ հարցերի շուրջ զրուցեցինք Սերգո Բագրատյանի հետ:
-Պարոն Բագրատյան, ի՞նչ ընթացք ստացավ մարզպետարանի դիզվառելիքի յուրացման գործը, և ինչպե՞ս Ձեզ հաջողվեց անմասն մնալ այդ քրեական գործից, թեև դուք այդ ժամանակ մարզպետ էիք:
– Քրեական գործից ինչի՞ եք ինձանից հետաքրքրվում, իրավապահ մարմիններից հարցրեք:
-Որքան էլ ձեզ հաջողվեց անմասն մնալ այդ քրգործից, պատասխաատվություն կրած կողմը պնդում էր, որ դուք չէիք կարող տեղյակ չլինել կատարվածից:
-Միայն իրավապահ մարմիններից հետաքրքրվեք: Ես կապ չունեմ այդ գործի հետ: Առնվազն իմ մասով քրեական գործ չի հարուցվել, և ես չգիտեմ էլ՝ ինչ գործ է հարուցվել: Միայն գյուղվարչության պետի նկատմամբ է քրեական գործ հարուցվել, դատարանով պայմանական դատավճիռ է կայացվել: Բայց ես ուզում եմ, որ դուք իրականությունը իմանաք, որ նման գործ չկա իրականում և չի եղել: Եղել է թերացում, որի համար մարզպետարանի գյուղվարչության պետը դատարանով ստացել է պատիժ:
-Հիմա ինչո՞վ եք զբաղվում, պարոն Բագրատյան:
-Ես հիմա զբաղվում եմ դասախոսական աշխատանքով և բիզնեսով:
-Իսկ կուսակցությունո՞ւմ:
-Կուսակցությունում տեսնում եք, երբ որ անհրաժեշտ է լինում, մեր կարիքը զգում են, մենք սիրով մասնակցում ենք սոցիալ-տնտեսական հանձնաժողովի նիստերին: Ինչով կարող ենք օգնել, մեր գիտելիքով, երկրի կայացմանը, օգնում ենք:
-Պարո՛ն Բագրատյան, քննարկվում է կառավարության հրաժարականը պահանջելու հարցը: Դուք համակարծի՞ք եք այդ պահանջին: Դուք պահանջո՞ւմ եք կառավարության հրաժարականը:
-Կառավարության հրաժարականի պահանջը երբ որ կմտնի Ազգային ժողով, նոր մեր դիրքորուշումը մեր պատգամավորները կհայտնեն: Դա պատգամավորական խմբակցությանը հարցրեք: Իսկ եթե իմ անձնական կարծիքն եք հարցնում, ապա ես կարծում եմ, որ եթե կառավարությունը ծրագիր ունի, որը պետք է ծառայեցնի ժողովրդին, և ժողովուրդը լավ կապրի, ապա որևէ խնդիր չկա: Իսկ եթե որևէ կառավարություն չի կարող սպասարկել ժողովրդի շահերը, բնականաբար պետք է զիջի ուրիշ կառավարության, որը կսպասարկի այդ շահերը:
-Այսօրվա վիճակը Ձեզ ի՞նչ է հուշում: Այսօրվա կառավարությունը կարողանո՞ւմ է սպասարկել ժողովրդի շահերը:
-Այսօր իրապես ծանր սոցիալ-տնտեսական վիճակ է: Բայց, դուք էլ լսեցիք, որ երկրի նախագահն ասաց, որ դրանք՝ աճի տեմպերը, պետք է քննարկվի և ճշտվի՝ արդյոք սուբյեկտիվ պատճառներ կա՞ն, թե՞ միայն օբյեկտիվ պատճառներ են: Բնականաբար, եթե պարզվի, որ միայն օբյեկտիվ պատճառներ են, կառավարության մեղքը չապացուցվի, խնդիր չի լինի: Բայց եթե նայենք երկրի մակրոտնտեսական վիճակը, համեմատենք հարևան երկրների հետ, ապա պարզ կլինի, որ մենք այսօր հրատապ լուծում պահանջող խնդիրներ ունենք:
-Ձեզ դուր եկա՞վ ձեր առաջնորդի ելույթը: Ո՞րն էր, ըստ Ձեզ, Ծառուկյանի ելույթի հիմնական մեխը, ի՞նչ էր նա ուզում ասել:
-Շատ դուր եկավ, շատ լավ ելույթ էր: Շատ կարևոր անդրադարձ էր: Հատկապես երկրորդ հատվածում, որտեղ այն հավաքական կարծիքը հայտնեց, որ միայն քաղաքական կոնսոլիդացիայով հնարավոր կլինի երկիրն այս վիճակից հանել: Եվ դա բոլոր քաղաքական ուժերի կոնսոլիդացիայի արդյունքում, հասարակության լայն շերտերի, ովքեր ի վիճակի են օգնելու երկրի տնտեսության զարգացմանը: Ջանքերի համախմբում է պետք, որ կարապ-խեցգետին-գայլաձուկի պատմությունը չկրկնվի:
-Ձեզ համար ընկալելի՞ է ԲՀԿ-ի քաղաքական գիծը: Ի՞նչ է նշանակում այլընտրանքային ուժ, և ինչպե՞ս է հնարավոր քննադատել կառավարությանը, բայց ոչ Սերժ Սարգսյանին, որը ձևավորել է այդ կառավարությունը:
-Այո, ԲՀԿ-ն այլընտրանքային քաղաքական ուժ է, որը դասական սահմանում ունի: Այլընտրանքային՝ նշանակում է հասարակությանը տալ ընտրության իրավունք: Չասել, որ եթե այս իշխանությունն է ղեկավարում երկիրը, ապա՝ վերջ: Մենք բոլորս ցանկացած հարաբերության մեջ նախընտրում ենք, որ այլընտրանք լինի: Կուսակցությունը նույնպես պետք է այլընտրանք լինի իշխանությանը: Ինչ վերաբերում է քննադատելուն, ապա կառավարությունն ինքը, որպես տնտեսական կառույց, այլ գործառույթ ունի, քան նախագահական ինստիտուտը: Դրանք տարբեր բաներ են: Ինչ է՝ որ նախագահն է ձևավորել կառավարությունը, ապա ի՞նքը պետք է անպայման պատասխան տա բոլորի համար: Գործադիր իշխանությունը, ի վերջո, երկրի բարձրագույն իշխանությունն է, իշխանության տարանջատված թև է ու պատասխանատվություն է կրում իր կատարած գործողությունների համար: Ինչպե՞ս կարելի է «ա»-ն «բ»-ից չտարբերել: Ամեն ինչի համար մեղադրել մեկ մարդու՝ ճիշտ չէ, արդարացի չէ: Բայց կառավարության գործունեության արդյունքը ես ամեն օր տեսնում եմ, և բոլորն են տեսնում: Նման իրավիճակում հանրային կարծիք չձևավորել և չփորձել փոխել իրավիճակը՝ կարծում եմ, նոնսենս է, չի կարելի այդպես:
Մենք այս բոլոր հարաբերությունների միջից անձը հանում ենք: Խնդիրները չպետք է լինեն անձնավորված: Խնդրի մասին պետք է խոսել և ոչ թե անձնավորել խնդիրը:
-Պարո՛ն Բագրատյան, ձեր փոփոխությամբ, ըստ էության, մարզը դարձավ ՀՀԿ-ական: Ինչպե՞ս եք գնահատում մարզում տարվող աշխատանքները:
-Այսպես ձևակերպեմ. ինձ համար շատ կարևոր է, որ մեր քաղաքներում, մեր գյուղերում առնվազն սոցիալական արդարության խնդիրները լուծվեն: Իմ մոտեցումը մի փոքր այլ է. ես չեմ կարծում, որ մարզը ՀՀԿ-ացվեց: Ես կարծում եմ, որ մարզում այս պահին տարվում է մի քաղաքականություն, որտեղ մարդը կարևոր արժեք է: Մենք ունենք ԲՀԿ-ական քաղաքապետ՝ Եղեգնաձորի քաղաքապետը, որի աշխատանքից քաղաքի բնակչության 70 տոկոսը գոհ է: Ինչ վերաբերում է մարզպետին, ապա ես իրավունք չունեմ գնահատելու նրա աշխատանքը, կոռեկտ չէ:
