Նագանո և Գումմա լեռնային պրեֆեկտուրաների սահմանին՝ Ուսուի անցումում, առաջացել է 20 կմ երկարությամբ խցանում, որտեղ ձյան «թակարդում» են հայտնվել 500 մեքենաներ, այդ թվում՝ զբոսաշրջային ավտոբուսներ:
Առնվազն 1000 մեքենա էլ արգելափակվել է Յամագատա պրեֆեկտուրայում: Վարորդները և ուղևորները կարող են սնունդ և տաք թեյ ստանալ օգնության ժամանակավոր հատուկ կետերում: Ճանապարհների մաքրման գործում ներգրավվել են բանակային ստորաբաժանումները:
Ուրբաթ օրվանից ձյան առատ տեղումներով պայմանավորված տարբեր միջադեպերի հետևանքով 20 մարդ է մահացել: Այս մասին հայտնում է ITAR-TASS-ը:
Ճանապարհատրանսպորտային պատահարների, տանիքների փլուզման, սողանքների հետևանքով տուժել է 1600 մարդ: Ճապոնիայի կենտրոնական հատվածի 7 պրեֆեկտուրաներում արտաքին աշխարհից կտրված է 11 բնակավայր, որտեղ մոտ 7000 մարդ է բնակվում: Իրականացվում են ճանապարհների մաքրման աշխատանքներ ծանր տեխնիկայի օգնությամբ:
Էլեկտրալարերի վնասման հետևանքով առանց էլեկտրականության է մնում ավելի քան 9000 ընտանիք: Ինչպես նախկինում, հիմնական երկաթուղային գծերով գնացքները շարժվում են մեծ ուշացումներով:
Օդերևութաբանների կանխատեսումներով՝ այս շաբաթ եղանակային վատ պայմանները կարող են շարունակվել: