Ժողովրդական կուսակցության առաջնորդ Տիգրան Կարապետյանի համար թե՛ իշխանությունը, թե՛ ՀԱԿ-ը նույնն են, ու, նրա գնահատմամբ, այս երկուսից և ոչ մեկը չի մտածում ժողովրդի մասին.
«Մեկն ուզում է՝ պահպանի իր օլիգարխիկ համակարգը, մյուսը` փոփոխություն մտցնի՝ բայց իր սեփական օլիգարխներով, չինովնիկներով: Ոչ առաջին, ոչ երկրորդ դեպքում ժողովուրդը չի զարգանում, եթե ժողովուրդը ինքը չի նվաճում, զարգացում չի լինում»:
Կարապետյանի խոսքերով՝ եթե այլ քաղաքական միավորումներ ձգտում են մարդաշատ դարձնել իրենց հանրահավաքները, ապա իր ստեղծած ազգային ճակատի համար դա առաջնային չէ. «Մենք ինքնակամ ենք, ինքնակոչ մարդիկ եթե ցանկանում են, պետք է գան միանան մեզ, չեն ցանկանում՝ թող չգան»:
Նա տեղեկացրեց, որ Ազգային ճակատն արդեն 15 հասարակական կազմակերպություն է միավորել իր շուրջ, որոնք լծվել են աշխատանքի և փորձում են միավորել այն էլեկտորատը, որին փոփոխություններ է պետք. «Ոչ թե ցանկանում ենք փայաբաժին ունենալ իշխանության մեջ, այլ ձգտում ենք արթնացնել ժոցովրդին, որովհետև միայն ժողովուրդը կարող է փոփոխություններ անել»:
Տիգրան Կարապետյանը նաև անդրադարձավ ՀԱԿ երեկվա հանրահավաքի ընթացքում ՀՀ հիմնադիր նախագահ, ՀԱԿ առաջնորդ Լևոն Տեր-Պետրոսյանի ելույթի այն հատվածին, որտեղ վերջինս նշում է, թե եթե պավիրակությունները չձևավորվեն, իրենք կպահանջեն Սերժ Սարգսյանի հրաժարականը. «Ինչի՞, նո՞ր են պահանջելու հրաժարականը, սեպտեմբերին են պահանջելո՞ւ, իսկ երեք տարի ինչ էին պահանջում»:
ԺԿ առաջնորդի դիտարկմամբ, սա ճնշման ձևաչափ է, որով ընդդիմությունը փորձում է այնպես անել, որ իշխանությունն իրենց հետ կիսվի: