Վենեսուելայի նախագահ Նիկոլաս Մադուրոն հայտարարել է, որ երկրի նախկին ղեկավար Ուգո Չավեսի հետևորդների և սոցիալիզմի կողմնակիցների կողմից բռնությունները չի հանդուրժի՝ հայտնում է Associated Press-ը:
Համապատասխան հայտարարությամբ նա հանդես է եկել Կարակասում՝ ելույթ ունենալով հանրահավաքի ժամանակ: Մադուրոն իր կողմնակիցներին, ովքեր ցանկանում են հեղափոխությունը պաշտպանելու համար զենք կիրառել, կոչ է արել լքել «չավիստների» շարքերը:
«Ես չեմ կարող համաձայնել Չավեսի կողմնակիցների կողմից բռնությունների հետ»,- ասել է նա: Մադուրոյի խոսքով՝ հեղափոխության կողմնակիցը «պետք է լինի բանակը, ընդ որում՝ խաղաղության, լույսի և սոցիալիզմի բանակը»:
Նա կոչ է արել պաշտպանել «հեղափոխական իդեալները փողոցներում», բայց խստորեն հարգելով քաղաքացիների սահմանադրական իրավունքները և առանց բռնությունների:
