«Մշակույթը ամեն տեղ է անկում ապրում: Երբ տնտեսական ճգնաժամեր են լինում, առաջին հերթին տուժում է մշակույթը: Երբեք ուշ չէ իրավիճակը շտկելու համար: Մեր ժողովրդի մեջ կան մարդիկ, որոնք իրենց գործի նվիրյալներ են, և անկախ վարձատրությունից ու նյութական պարգևներից՝ շարունակում են ծառայել իրենց գործին: Մեզ նման փոքրաթիվ բնակչություն ունեցող երկրի համար Ֆիլհարմոնիկ նվագախումբ ունենալը մեծ շռայլություն է, որը, ի դեպ, վերջին տարիներին մեծ թռիչք է ապրել»,- «Առաջին լրատվական»- ի հետ զրույցում այս մասին ասաց օպերային հանրահայտ երգչուհի, ՀՀ ժողովրդական արտիստ Հասմիկ Պապյանը՝ անդրադառնալով դիտարկմանը, որ Հայաստանում չկա պետական ռազմավարություն, քաղաքականություն մշակութային ոլորտում:
Երգչուհու դիտարկմամբ՝ կրթությունը մեր ազգային դիմանկարն է, և ամեն ինչ պետք է անենք, որ այն չկորցնենք. «Պետք է առաջ նայենք, կրթվենք: Առաջխաղացում կա այս իմաստով»:
«Չպետք է թույլ տանք, որ այս գլոբալիզացիայի ժամանակներում մեր նավը խորտակվի,- ընդգծեց մեր զրուցակիցը,- Ազգային դիմագիծ ունենալը այսօր կարծես մոդայիկ չէ, բայց որպեսզի կարողանանք ափ դուրս գալ, չպետք է տրվենք այն հորձանուտին, որի տենդենցները կան ամբողջ աշխարհում, պետք է ունենանք մեր ազգային դիմագիծը, պետք է պահպանենք մեր մշակույթը»:
Մանրամասն՝ տեսանյութում: