Պաշտոնական Տրիպոլիի և անցումային ընդդիմադիր Ազգային խորհրդի ներկայացուցիչների միջև ընթանում են ինչպես ուղիղ, այնպես էլ միջնորդավորված բանակցություններ: Այս մասին հինգշաբթի երեկոյան հայտարարել է Մուամար Քադաֆիի դուստրը՝ Աիշան, ֆրանսիական France2 հեռուստաալիքին տված հարցազրույցում:
«Ներկա պահին ընթանում են ինչպես ուղիղ, այնպես էլ միջնորդավորված բանակցություններ: Մենք բոլոր ջանքերը ներդնում ենք, որպեսզի դադարի թափվել լիբիացիների արյունը: Դրա համար մենք պատրաստ ենք համաձայնության գալ նույնիսկ սատանայի, այսինքն՝ զինված ապստամբների հետ»,- ասել է Քադաֆիի դուստրը: Այս մասին հաղորդում է France Presse գործակալությունը:
Այն հարցին, թե երբ է իր հայրը հեռանալու, նա զայրացած պատասխանել է, որ «Մուամար Քադաֆին լիբիացի ժողովրդի խորհրդանիշն ու առաջնորդն է»: «Նա ո՞ւր կարող է գնալ»,- տարակուսել է Աիշան: Նա սուր քննադատության է ենթարկել միջազգային կոալիցիայի գործողությունները Լիբիայում:
Նա կոչով դիմել է «Լիբիան ռմբակոծող ֆրանսիացի օդաչուների մայրերին և կանանց». «Իմ մի զավակն արդեն զոհվել է: Ձեր ամուսիններն ամենևին էլ չեն պաշտպանում Լիբիայի քաղաքացիական բնակչությանը: Նրանք սպանում են իմ ժողովրդին և իմ երեխաներին: Եվ դա միայն այն բանի համար, որ Սարկոզին սփոփի իրեն այն գաղափարով, թե որքան շատ լիբիացի սպանի, այնքան ավելի շատ ձայն կհավաքի առաջիկա նախագահական ընտրությունների ժամանակ»,- ասել է Քադաֆիի դուստրը: