Աջ ղեկով մեքենաների ներմուծման չարկչրկված թեման այսօր էլ չլուծվեց, թեև օրենքի նախագիծն ընդգրկված էր կառավարության նիստի օրակարգում։ Երբ տրանսպորտի նախարար Հակոբ Արշակյանը ներկայացրեց նախագիծը, համաձայն որի՝ հնարավորություն պետք է ընձեռվեր ՀՀ մաքսային տարածքներում տեղակայված աջակողմյան ղեկային տեղաբաշխմամբ տրանսպորտային միջոցները, ինչպես նաև այն աջակողմյան ղեկային տեղաբաշխմամբ տրանսպորտային միջոցները, որոնց ձեռք բերման համար վճարումները կատարվել են մինչև 2018 թվականի դեկտեմբերի 30-ը, ՀՀ տարածք ներմուծել մինչև 2019 թվականի ապրիլի 1-ը, վարչապետն առարկեց, որ այն վերաբերի մինչև 2018 թվականի դեկտեմբերի 30-ը գնված մեքենաներին։ Այսինքն՝ արդեն իսկ գնված աջակողմյան բոլոր մեքենաներին, որոնց մի մասը գտնվում է ճանապարհին, մի մասը՝ Փոթիի նավահանգստում, մաքսատան տարածքում և Վրաստանում առհասարակ, որոնց ընդհանուր թիվը հասնում է 1000-1200-ի։ Վարչապետը նշեց, որ իր և աջ ղեկով մեքենաներ ներմուծողների պայմանավորվածությունը եղել է այն, որ նախագիծը պետք է վերաբերի բացառապես մաքսատանը կուտակված մեքենաներին։
«Հիմա հարցին սենց լղոզված մեկնաբանություններ տալով՝ մենք ոչ թե լուծում ենք, այլ երկարացնում ենք։ Մեր պայմանավորվածությունը եղել է այն, պետք է ներմուծվեն կոնկրետ այն մեքենաները, որոնք արդեն գտնվում են մաքսային գոտում։ Դա է եղել մեր պայմանավորվածությունը։ Չի կարող լինել այնպես, որ մի բան պայմանավորվենք, մեկ այլ բան իրականացնենք»,-ասաց վարչապետը՝ հարցը հանելով նիստի օրակարգից։
«Ղեկը աջ» նախաձեռնության համակարգողներից Զորիկ Իգիթյանն «Առաջին լրատվական»-ի հետ զրույցում ասաց, որ կառավարության այսօրվա քննարկումից հետո իրենք ժողով են հրավիրել նախաձեռնության բոլոր անդամների հետ, որտեղ պետք է քննարկեն հարցը։ «Մենք ունենք վարչապետի հետ մեր առաջին հանդիպման ձայնագրությունը ամբողջությամբ։ Մենք կփորձենք ժողովն անցկացնել, որից հետո կամ հայտարարություն կտարածենք, կամ մամուլի ասուլիս կհրավիրենք»,- ասաց նախաձեռնության համակարգողը։
«Ղեկը աջ» նախաձեռնության ֆեյսբուքյան էջում, սակայն, նախաձեռնության անդամները գրել են, որ «3 ամիս է անցել, և վարչապետը մոռացել է մեր պայմանավորվածության մասին։ Իսկ ինչ վերաբերվում է վինկոդերին, մենք դրանք ներկայացրել ենք տրանսպորտի նախարարություն, բայց դրանք նախագծի մեջ չեն ներառվել։ Հարգարժան պարոն վարչապետ, այո՛, դա լավ ձև չի՝ մի բան պայմանավորվել և հետո գալ հընթացս բոլորովին ուրիշ բան իրականացնել…»։
Նկատենք, որ և՛ վարչապետը, և՛ նախաձեռնության անդամները խոսում են 2018-ի նոյեմբերի 28-ի հանդիպման մասին, որտեղ նախաձեռնության անդամները և վարչապետը քննարկում են հարցը։ Ներմուծողները վարչապետին առաջարկում են տրամադրել արդեն իսկ գնված մեքենաների վինկոդերը, խոսքը 800-1200 մեքենայի մասին է, և դրանից հետո այլևս չեն գնի և չեն փորձի ներկրել աջ ղեկով մեքենաներ։ Վարչապետը ներմուծողներին լսելուց հետո ասում է, որ «կնայի հարցը, կխորանա», սակայն որևէ հստակ պատասխան չի հնչում։ «Այս պահին բան չեմ ասում»,-ասում է վարչապետն ու հեռանում։
Լուսանկարը՝ Photolure-ի