Վրաստանի կառավարությունը տարեվերջին կհայտարարի Սև ծովում նավթի-գազի պաշարների յուրացման աճուրդ: Այդ մասին խորհրդարանում հայտարարել է երկրի Էկոնոմիկայի և կայուն զարգացման նախարար Գեորգի Քոբուլիան:
«Exxon լրջագույն ընկերությունը կատարում է մեր Սև ծովի ներուժի հետազոտություն: Տարեվրջին այն կավարտվի, և մենք կհայտարարենք Սև ծովի նավթի և գազի պաշարների յուրացման աճուրդ»,- ասել է Քոբուլիան: Վրաստանում գազի արդյունահանման հնարավորությունները հետազոտում է նաև ԱՄՆ-ի Schlumberger ընկերությունը:
«ԱՄՆ-ի Schlumberger ընկերությունն զբաղվում է մի քանի հորատանցքերի հորատմամբ, և ստացվել են դրական արդյունքներ, ինչը մեզ հնարավորություն կընձեռի որոշակի ծավալի գազ ստանալ»,- ասել է Քոբուլիան:
2018 թվականին Վրաստանում արդյունահանվել է ավելի քան 30 հազար տոննա նավթ և 16.5 միլիոն խորանարդ մետր գազ: Վրաստանը տարեկան միջին հաշվով սպառում է շուրջ 1.2 միլիոն տոննա նավթամթերք և շուրջ 2.5 միլիարդ խորանարդ մետր գազ: Ածխաջրածինները (նավթը և գազը) հիմնականում ներմուծվում են Ադրբեջանից, Ռուսաստանից, Ռումինիայից եւ Բուլղարիայից, հաղորդել է «Sputnik Վրաստան»-ը:
