Грузия Online-ի փոխանցմամբ՝ Վրաստանում ավարտվել է ամերիկյան կոնգրեսականների՝ հունիսի 27-ին մեկնարկած այցը։ Ամերիկյան կոնգրեսականների պատվիրակությունը ղեկավարել է հանրապետական Դեն Բարտոնը։ Պատվիրակությունը բաղկացած էր 6 հանրապետական ու դեմոկրատ կոնգրեսականներից։
Վրացական այցի ընթացքում ամերիկյան կոնգրեսականները հանդիպումներ են ունեցել Վրաստանի նախագահ Միխեիլ Սաակաշվիլիի, վարչապետ Նիկա Գիլաուրիի, Ազգային անվտանգության խորհրդի քարտուղար Գիորգի Բոկերիայի, Վրաստանի խորհրդարանի փոխխոսնակ Գիորգի Ծերեթելիի և խորհրդարանի այլ անդամների, ինչպես նաև արտգործնախարարության ներկայացուցիչների հետ։
Հանդիպումների ժամանակ կողմերը քննարկել են Վրաստանի ու ԱՄՆ-ի միջև համագործակցությանն առնչվող հարցերի լայն շրջանակ։ Կոնգրեսականները մանրամասնորեն իրազեկվել են Վրաստանում տեղի ունեցած բարեփոխումների և Ռուսաստանի կողմից Վրաստանի օկուպացված տարածքներում տիրող իրավիճակի մասին։
Հիշեցնենք, որ մինչ ամերիկյան կոնգրեսականների վերոնշյալ այցը, Վրաստանի փոխարտգործնախարար Նինո Կալանդաձեն հայտարարել էր, որ այս տարվա ապրիլից սկսած՝ կոնգրեսականների այդ այցը կլինի 5-րդը, ինչը խոսում է Վրաստանի հանդեպ ամերիկյան օրենսդիրների հետաքրքրության աճի մասին։