Հայ ազգային կոնգրեսն այսօր հանրահավաք է անցկացնելու Ազատության հրապարակում, որի ինտրիգն այն է, թե ինչ է պատասխանելու Կոնգրեսը Սերժ Սարգսյանի ելույթին, որտեղ Սարգսյանն անդրադարձել էր երկխոսության վերաբերյալ ընդդիմության առաջարկին: Ինչպես հայտնի է, Սերժ Սարգսյանն ուղղակիորեն մերժել էր պատվիրակություններով բանակցության գաղափարը, սակայն նշել նաև, որ Կոնգրեսի պատվիրակությանը պատրաստ են առանձին-առանձին լսել ԱԺ նախագահը, վարչապետը, իսկ հարկ եղած դեպքում էլ իր աշխատակազմի ղեկավարը:
Այդպիսով, Հայ ազգային կոնգրեսն այսօր երևի թե պատասխանելու է իշխանությանը: Սակայն պետք չէ նաև բացառել, որ Կոնգրեսի պատասխանը ոչ թե կտեղավորվի այո-ի կամ ոչ-ի շրջանակում, այլ կպարունակի մոտավորապես այնպիսի թեզեր, ինչպիսին իր մեջ պարունակում էր Սերժ Սարգսյանի պատասխանը: Այսինքն` չի բացառվում, որ Կոնգրեսը հանդես գա նոր առաջարկություններով, որոնց միջոցով կփորձի հստակեցնել Սերժ Սարգսյանի բավական լղոզված և հեղհեղուկ պատասխանը: Չի բացառվում, սակայն, որ Կոնգրեսը պարզապես փորձի Սերժ Սարգսյանին առավել հստակ դաշտ բերել վերջնագրային բովանդակությամբ պատասխանով:
Գուշակություններ անելն այս դեպքում, իհարկե, անշնորհակալ գործ է, և թերևս ավելի ճիշտ կլինի պարզապես սպասել մի քանի ժամ և ստանալ բոլոր հարցերի պատասխանները: Պարզ է մի բան, որ այսօրվա հանրահավաքը հանգրվանային կամ բեկումնային, կամ ջրբաժանային չի լինելու, սակայն դրանից հանրահավաքի նշանակությունն իհարկե չի նվազում, քանի որ այսօրվա հանրահավաքը անկասկած նախանշելու է մի քանի կարևոր բան` ինչպիսի տրամադրվածություն ունի Կոնգրեսը ամառային շրջանի համար, ինչպիսի տրամադրություններ են առկա հասարակության շրջանում:
Եվ նաև այսօրվա հանրահավաքում կարևոր արձանագրում կլինի նաև այս երկու գործոնների փոխլրացվածության մակարդակի առումով: Այդ իսկ պատճառով հանրահավաքը չլինելով վճռական, բեկումնային կամ հանգրվանային, ինչպես ընդունված է ասել, այսուհանդերձ բավական որոշիչ և կանխորոշիչ է զուտ քաղաքական գործընթացների զարգացման տեսանկյունից, մասնավորապես նաև ներքաղաքական օրակարգի հստակեցման առումով: