«Հեղափոխությունից հետո հայրենիքում լինելու և՛ պատճառներն են շատացել, և՛ ցանկությունները»,- «Առաջին լրատվական»- ի հետ զրույցում ասաց Գլենդելի քաղաքապետ Զարեհ Սինանյանը: Նրա խոսքով՝ նոր իշխանությունից ամերիկահայերի ակնկալիքները շատ են. «Բոլորն ակնկալում են, որ այն խոստումները և գաղափարները, որոնք հեղափոխության հիմքում էին, իրագործվելու են: Մարդիկ պարզապես ուզում են, որ Հայաստանը հաջողի: Հույս ունենք, որ այն Հայաստանը, որ կերտվում է այսօր, լինելու է մեր երազած Հայաստանը»:
Անդրադառնալով դիտարկմանը, որ Հայաստանում տնտեսական հեղափոխության մեկնարկ է տրվել՝ մեր զրուցակիցը նշեց, որ իր դիտարկմամբ՝ տնտեսական հեղափոխությունը տնտեսության ազատականացումն է. «Խոսքը դեպի Հայաստան վայրի կապիտալիզմի մուտքի մասին չէ, այլ ազատ մրցակցության մուտքի, և նրա, որ օլիգարխիկ բացասական երևույթները գերիշխող չեն լինի Հայաստանում, և եթե մարդն ուզում է ներդրում անել, ապա կարող է անել առանց ծանոթություն ունենալու և առանց սարսափելու, որ կարող են իրեն անարդարացիորեն զրկել իր ունեցվածքից»:
Զ. Սինանյանի խոսքով՝ սփյուռքահայերը սպասողական վիճակում են, գործարարներն ուզում են հասկանալ՝ որ ոլորտում կարելի է ներդրումներ անել, ինչն է առաջնային Հայաստանի համար: «Դատական համակարգը չի փոխվել, նախկին կաշառակեր դատավորները չեն փոխվել, նոր իրավական համակարգ չի հիմնադրվել, արդարադատության համակարգի հեղափոխությունը դեռ չի ավարտվել, իսկ դա տնտեսական ներդրումների ամենակարևոր գրավականն է»,- ընդգծեց Զ. Սինանյանը:
Անդրադառնալով հարցին, թե սփյուռքահայության շրջանում ինչպես է դիտարկվում կառավարության օպտիմալացման նախագիծը, որի արդյունքում այլևս չեն լինի Սփյուռքի և Մշակույթի նախարարություններ, Զ. Սինանյանը նշեց, որ կարծիքները միանշանակ չեն, մի մասի մոտ տխրություն կամ զայրույթ է առաջացնում, մյուս մասը մտածում է, որ ոչինչ չի փոխվի, և որ այլ երկրներում նույնպես չկան նման նախարարություններ: «Իմ կարծիքով՝ Սփյուռքի հետ շատ լուրջ աշխատանք պետք է տարվի, Սփյուռքը մեծ դիվիդենտներ կարող է բերել ՀՀ-ին, Սփյուռքը ՀՀ-ի ուղղորդության կարիքն ունի, բայց չեմ կարծում, որ դա պետք է լինի Սփյուռքի նախարարություն կոչված կառույցի միջոցով… Անկախ նրանից, թե ինչ կկոչվի այդ կառույցը, կարևորը Սփյուռքի հետ հարաբերությունների տեսլական ու ծրագիր ունենալն է… Սփյուռքի նախարարությունը որևէ դեր չխաղաց, այն ստեղծվել էր Սփյուռքի աչքին թոզ փչելու, սիրաշահելու համար. կազմալուծումը մտահոգիչ չէ»:
Մանրամասն՝ տեսանյութում:
