ՄԱՀՀԻ փորձագետ Արմեն Վարդանյանի կարծիքով՝ անցնող մեկ շաբաթվա ընթացքում խորհրդարանում բավականին հետաքրքիր քննարկումներ տեղի ունեցան։ «Պետք է ասել, որ ԱԺ-ն ցույց տվեց, որ ապագայում արտաքին հարաբերությունների մասով թեժ քննարկումներ են լինելու։ Լավ է, որ ընդդիմադիր ֆրակցիաները քննադատում են իշխանություններին արտաքին քաղաքական ուղղությամբ։ Նախկին իշխանությունները դեսպանների մասով լուրջ վրիպումներ ունեին, և շատ լավ է, որ ԼՀԿ ներկայացուցիչները այս հարցը խորհրդարանում բարձրացրեցին»,- «Առաջին լրատվական»-ի հետ զրույցում ասաց նա։
Վարդանյանի դիտարկմամբ՝ պատգամավոր Հայկ Կոնջորյանի վրիպումն Իրանի մասով հայ-իրանական հարաբերություններում լուրջ ազդեցություն չի ունենա։ Միևնույն ժամանակ, մեր զրուցակցի խոսքերով, երկկողմ հարաբերությունները զարգացման լուրջ ներուժ ունեն. «Պետք չէ տագնապային տրամադրություններ ունենալ, իհարկե, անհաջող հայտարարություն էր, բայց աշխարհի վերջը չէ, դիվանագիտական սկանդալ չի առաջանա։ Բայց զարմանալի է, որ վարչապետ Փաշինյանը Իրան այց չի կատարում, մի քանի ամիս առաջ ԱԽ քարտուղար Արմեն Գրիգորյանն ասել էր, որ այդպիսի այց է նախապատրաստվում, բայց մինչ այժմ որևէ նորություն չունենք»։
Ըստ նրա՝ Իրանում մեծ հույսեր ունեն՝ հաշվի առնելով նաև այն փաստը, որ Նիկոլ Փաշինյանը նախկինում եղել է հայ-իրանական բարեկամական խմբի պատգամավոր։
Հարցազրույցն ամբողջությամբ՝ տեսանյութում։
