«Ցանկացած խելամիտ բանակցային գործընթաց ավելի լավ է, քան բանակցային գործընթացի բացակայությունը: Միշտ էլ նման հայտարարություններ լինում են. համանախագահների աշխատանքի մի մասն է քաջալերել հանդիպումները և բանակցային գործընթացը»,- «Առաջին լրատվական»- ի հետ զրույցում այս մասին ասաց ԱԺ պատգամավոր, քաղաքագետ Միքայել Զոլյանը՝ անդրադառնալով հունվարի 16-ին Հայաստանի և Ադրբեջանի արտգործնախարարների՝ Փարիզում կայացած հանդիպմանը և դրա վերաբերյալ Մինսկի խմբի հայտարարությանը: «Մեզանում փորձում են տողերի ետևում շատ բան տեսել. քաղաքական կողմնորոշումներից կամ ինչ-ինչ օրակարգերից կախված՝ այս կամ այն քաղաքական ուժը կամ լրատվամիջոցը կարող է ինչ-որ ենթատեքստ տեսնել՝ ասելով՝ զիջում են Արցախը կամ ընդհակառակը՝ չեն կարողանում հարցի կարգավորմանը հասնել: Այս ամենը պետք է մի կողմ դնել և սա դիտարկել որպես բանակցային հերթական փուլ է»,- նշեց քաղաքագետը:
Նրա դիտարկմամբ՝ Հայաստանում իշխանություն է փոխվել, և դրա հետևանքով ամբողջ տարածաշրջանում իրավիճակ է փոխվել. «Կողմերը պետք է ինչ-որ չափով նորից իրար ճանաչեն, հասկանան միմյանց մոտեցումները. չեմ կարծում, որ հնարավոր է բանակցային գործընթացում հասնել առաջընթացի առանց երկար խոսելու: Առայժմ հենց այն փուլն է, երբ կողմերը բացատրում են իրենց դիրքորոշումները»:
«Արցախը բանակցային սեղանի շուրջ վերադարձնելը շատ ավելի դժվար է լինելու, քան եթե ժամանակին Արցախը բանակցային գործընթացից դուրս չթողնեինք: Դրա համար գուցե ամիսներ կամ տարիներ պահանջվեն, բայց կարևոր է, որ այդ ուղղությամբ գործընթացը սկսվել է, այդ գաղափարը դարձել է արցախյան խնդրի կարգավորման շուրջ խոսույթի մի մասը»,- նշեց մեր զրուցակիցը:
«Նախկինում Ադրբեջանի ռազմավարությունը հետևյալն էր. մտածում էին, որ կարելի է ճնշել Հայաստանի իշխանություններին և նրանցից կորզել զիջումներ, իսկ ժողովրդի հետ պետք չէ հաշվի նստել: Ադրբեջանի իշխանությունները հասկացել են, որ այդ ճանապարհով ոչնչի չեն հասնելու:
Ապրիլյան պատերազմը ցույց տվեց, որ ռազմական ճանապարհը չի աշխատում: Չի աշխատում նաև տնտեսական ճնշումների ճանապարհը: Այն հանգամանքը, որ Հայաստանում իշխանություն է փոխվել, նրանց հնարավորություն է տալիս դեմքը փրկելով՝ նստել բանակցային սեղանի շուրջ…
Ամեն դեպքում մենք պետք է պատրաստ լինենք, որ մի օրվա մեջ կարող է այս քաղաքականությունը փոխվել, կարող են սադրանքներ լինել»,- նշեց քաղաքագետը:
Համանախագահների հայտարարության մեջ նաև նշված է, որ արտգործնախարարների հանդիպման ընթացքում զրուցակիցներն անդրադարձել են խաղաղ գործընթացին առնչվող հարցերի լայն շրջանակի՝ ներառյալ ժողովուրդներին խաղաղությանը նախապատրաստելուն, անվտանգությանն ու տարածաշրջանային կայուն զարգացմանը: Անդրադառնալով այս դիտարկմանը՝ քաղաքագետը նշեց. «Ազգերին խաղաղության նախապատրաստելը նշանակում է, որ կողմերը պետք է հրաժարվեն ատելության լեզվից, թշնամու կերպար ստեղծելուց, ռազմական հանցագործներին հերոսացնելուց»:
Մանրամասն՝ տեսանյութում:
