Չինական «Ես դերասան եմ» ռեալթի շոուի վերջին դրվագում չինացի դերասան և երգիչ Ցզին Բոջանոյի ականջօղերը ռետուշել են, հայտնում է CNN-ը:
Տեղեկացվում է, որ Ցզինը միակը չէ, որ ռետուշի զոհ է դարձել: Weibo սոցիալական ցանցում, որը Twitter-ի չինական նմանօրինակն է, արական սեռի այլ ներկայացուցիչների ականջօղերը նույնպես «լղոզվել են» ֆոտոշոպի օգնությամբ:
CNN-ի փոխանցմամբ, հայտնի չէ, թե դա Չինաստանում ընդունված նոր օրենքի արդյունքն է, որն արգելում է ցուցադրել տղամարդկանց ականջօղերը, թե հեռուստաալիքի խմբագիրների նախաձեռնությունն է:
Հոնգկոնգի չինական համալսարանի ժուռնալիստիկայի և հաղորդակցության դպրոցի պրոֆեսոր Գրեյս Լուենի խոսքերով, այս որոշումը կարող է պայմանավորված լինել Չինաստանի փոփ մշակույթի վրա Արևմուտքի ազդեցությունը նվազեցնելու կառավարության ցանկությամբ:
«Սա Արևմուտքի ազդեցությունից իրենց մշակույթի հետևողական մաքրման քաղաքականությունն է և առնականության չինական պատկերացման ամրապնդումը»,- ասել է Գրեյս Լուենը:
