ԱԺ-ում շարունակվել է հունվարի 14-ին մեկնարկած առաջին նստաշրջանը: Այսօր պատգամավորները քննարկել են հանձնաժողովների նախագահների ընտրության հարցը: Խորհրդարանը 9-ի փոխարեն կունենա 11 հանձնաժողով, որոնցից 8-ը բաժին կհասնի «Իմ քայլը» դաշինքին, 2-ը՝ ԲՀԿ-ին և, 1-ը՝ «Լուսավոր Հայաստանին»: Այս նստաշրջանի օրակարգում է նաև կառավարության ծրագրին հավանություն տալու հարցը, ինչպես նաև կառավարության կառուցվածքի վերաբերյալ օրենքի նախագծի քննարկումը, որով նախատեսվում է կրճատել նախարարությունների թիվը՝ 17-ից դարձնելով 12: Սակայն այս երկու հարցերի քննարկումը տեղի կունենա ավելի ուշ, երբ ձևավորված կլինի նոր կառավարությունը, ինչպես նաև վերջնական տեսքի կբերվի կառավարության կառուցվածքը փոխելու վերաբերյալ նախագիծը: Ի դեպ, նախարարությունների թվի կրճատման անխուսափելիության մասին է խոսվել նաև կառավարության այսօրվա նիստում: Թեմայի շուրջ «Առաջին լրատվական»- ի հետ քննարկմանը մասնակցեցին կառավարման փորձագետ Սերոբ Անտինյանը, վերլուծաբան Հայկ Բալանյանը և քաղաքագետ Էմիլ Օրդուխանյանը:
Հ. Բալանյանի խոսքով՝ նոր ԱԺ պատգամավորները երիտասարդ են, «սխալներ կլինեն, բայց նրանց մեծ մասը կամաց-կամաց կոսովորեն»: Է. Օրդուխանյանի դիտարկմամբ՝ մեկնարկային ներուժ կա, որպեսզի խորհրդարանը դառնա գլխավոր քաղաքական հարթակ. «Խորհրդարանը քննարկումների և բանավեճերի առաջին հարթակն է: Պետք է հնարավորություն տալ փորձ ձեռք բերվի, բայց լավ կլինի, որ զուգահեռ նաև պառլամենտարիզմի համատեքստում օրենսդիրներին համապատասխան գիտելիքների ցենզը հետզհետե աճի, որովհետև օբյեկտիվորեն և սուբյեկտիվորեն նկատելի են թերացումներ, որին պետք է մեծ ուշադրություն դարձնի այսօրվա լեգիտիմ խորհրդարանը»:
Անդրադառնալով դիտարկմանը, որ կա կարծիք, թե այս խորհրդարանն աշխատում է հին ուժերի ոճով՝ Ս. Անտինյանը նշեց. «Նորընտիր խորհրդարանի աշխատանքի առաջին օրերը թույլ են տալիս ասելու, որ գործ ունենք քաղաքական համակարգի ձևավորման հետ: Մենք ունեինք քաղաքական կեղծ համակարգ, քաղաքական համակարգի իմիտացիա, քաղաքական գործընթացները, որոնք տեղի էին ունենում նախկին ԱԺ-ում, պայմանավորված էին կլանային, օլիգարխիկ շահերի սպասարկումով:
Ներկայիս ԱԺ-ի կազմը բոլորովին այլ է, նոր ԱԺ-ն ունի բոլոր հնարավորությունները՝ դառնալու լիարժեք քաղաքական մարմին: ԱԺ-ում ընթանում են բուռն, անկեղծ քննարկումներ: Պատգամավորները դեռ չեն բացվել, քաղաքական «մարզավիճակում» չեն, բայց դա ամենահեշտ ձեռքբերումն է: «Իմ քայլ»-ում կան կրթական բարձր ցենզով շատ մասնագետներ: Մենք անընդհատ ստանում ենք մեսիջներ, որ առողջ քաղաքական համակարգ է ձևավորվում»:
Մանրամասն՝ տեսանյութում:
