Լիբանանի հարցով ստեղծված հատուկ միջազգային տրիբունալը հաջորդ շաբաթ հրապարակելու է Լիբանանի նախկին վարչապետ Ռաֆիկ Հարիրիի սպանության քննության արդյունքները: Լիբանանյան The Daily Star-ին հայտնի է դարձել, որ սպանության հիմնական ղեկավար է հայտարարվելու «Հիզբոլլահ» խմբավորման առանցքային հրամանտարներից մեկը:
Մեղադրանքը հուլիսի 3-ին կամ 4-ին կարդալու է Լիբանանի պետական դատախազ Սաիդ Միրզային: Նշվում է նաև, որ գլխավոր մեղադրյալն ապրում է Լիբանանի տարածքում: Թերթի աղբյուրը նշել է, որ «հաջորդ փուլը լինելու է ամենադժվարը»: «Տրիբունալը կփոխանցի մեղադրյալների անունները լիբանանյան իշխանություններին, և լիբանանցիները պետք է ձերբակալեն նրանց: Նրանք, սակայն, չեն կարողանա դա անել, քանի դեռ կառավարությունում գերիշխում է «Հիզբոլլահը»: Իրավական տեսակետից իշխանությունները շատ ոչ միանշանակ իրավիճակում են», ասել է աղբյուրը:
