«Առաջնագծում իրավիճակն այսօր վերջին երկու օրերի համեմատ հանգիստ է, բայց այդ իրավիճակը շատ արագ կարող է փոփոխվել. առաջնագծում՝ բավականին մոտ տարածքներում, կա զինտեխնիկայի այնպիսի ծավալ, որ շատ կարճ ժամանակի ընթացքում իրավիճակը կարող է փոխվել»,- «Առաջին լրատվական»-ի հետ զրույցում ասաց Արցախի նախագահի անվտանգության հարցերով խորհրդական Տիգրան Աբրահամյանը:
Նրա խոսքով՝ կարող է լինել հրադադարի ռեժիմ, բայց հակառակորդը դիմի այնպիսի գործողությունների, որ իրավիճակը բնորոշվի ռիսկային. «Օրինակ՝ նրանք զորավարժություն են անցկացնում սահմանագծից մոտ 8, 9 կմ-ի վրա»:
Տիգրան Աբրահամյանը ընդգծեց, որ Արցախում լավատեսորեն չեն կարող վերաբերվել Ադրբեջանի հետ ցանկացած՝ բանավոր, թե գրավոր, համաձայնության. «Որովհետև վերջին երեք տասնամյակի ընթացքում բազմիցս ականատես ենք եղել Ադրբեջանի կողմից մեծ թվով պայմանավորվածությունների խախտումների: Մենք իհարկե հարգում ենք ինչպես 94-ի, այնպես էլ դրանից հետո ձեռք բերված պայմանավորվածությունները, սակայն մենք դրանից, այսպես ասեմ, արխային չենք ընկնում և առաջնագծում մեր բոլոր ֆունկցիոնալ աշխատանքները պատշաճ իրականացնում ենք»:
Ադրբեջանական կողմի «լավատեսությունը», Մամեդյարովի «փոխըմբռնման» մասին հայտարարությունը մեր զրուցակիցը համարում է իմիտացիա. «Դրանով Ադրբեջանն ավելի շատ փորձում է վերակառուցել իր իմիջը, նա փորձում է ցույց տալ, որ փորձում է դիրքավորվել որպես կառուցողական կողմ: Դրանք ես համարում եմ իմիտացիա, որովհետև այդ ուղերձների ետևում երբեք գործնական քայլեր չեն եղել»:
Հարցազրույցն ամբողջությամբ՝ տեսանյութում:
