Грузия Online-ի փոխանցմամբ՝ Վրաստանի խորհրդարանի խոսնակ Դավիթ Բաքրաձեն այսօր Բրյուսելում գտնվող ՆԱՏՕ-ի շտաբ-կայանում հանդիպում է ունեցել ՆԱՏՕ-ի գլխավոր քարտուղար Անդերս Ֆոգ Ռասմուսենի հետ։
Հանդիպման ժամանակ կողմերը քննարկել են Վրաստան-ՆԱՏՕ հարաբերությունները։ Քննարկվել են նաև ՆԱՏՕ-ի դեսպանների ու գլխավոր քարտուղարի Թբիլիսի այցելելու մանրամասները։
Նախնական տեղեկություններով՝ ՆԱՏՕ-ի խորհրդի նիստը Թբիլիսիում տեղի կունենա այս տարվա նոյեմբերին։ Դրան անձամբ ներկա է գտնվելու ՆԱՏՕ-ի գլխավոր քարտուղարը։
Հիշեցնենք, որ նախորդ տարվա սեպտեմբերին ՆԱՏՕ-ի գլխավոր քարտուղարի կարգավիճակով Ռասմուսենն արդեն իսկ այցելել է Թբիլիսի, և աշնանային այցը կլինի նրա երկրորդ վրացական այցը։
