Интерфакс գործակալության փոխանցմամբ՝ Թուրքիայի Բոդրում հանգստավայրում անորակ ալկոհոլից մահացած երեք ռուս զբոսաշրջիկների հարազատները մտադիր են դիմել դատարան և պահանջել 100,000 դոլարի փոխհատուցում։ Այս մասին հայտարարել է Արտասահմանում ռուս քաղաքացիների պաշտպանության ու օգնության կենտրոնի նախագահ Ռոման Բոբիլևը։
Վերջինս նշել է. «Մահացածների հարազատները մտադիր են փոխհատուցում պահանջել թուրքական զբոսաշրջային կազմակերպությունից ու զբոսանավի տիրոջից։ Մենք հետամուտ ենք լինելու թուրքական դատարանում հարուցված այդ գործի ընթացքին»։
Հիշեցնենք, որ ռուս զբոսաշրջիկների զանգվածային թունավորումը տեղի էր ունեցել մայիսի 27-ին։
