Ռուսաստանի քաղաքական կոնյունկտուրայի կենտրոնի գլխավոր տնօրեն Սերգեյ Միխեևը, Երևան-Մոսկվա տեսակամրջի ընթացքում անդրադառնալով կազանյան հանդիպմանը, նկատեց, որ բեկում չեղավ շատ պարզ մի պատճառով. «Հայկական կողմն իր դիրքորոշումն ունի, ադրբեջանականը՝ իրենը, և այդ դիրքորոշումներն ընդհանրապես չեն հատվում: Ինչպես կարելի է համաձայնության բերել երկու մարդկանց, որոնցից մեկն ասում է՝ դու հիմար ես, մյուսն էլ պատասխանում է՝ հիմարը դու ես: Ասենք՝ երկուսդ էլ հիմար եք, չգիտեմ, թե դա ինչքանով կօգնի»:
Միխեևն իրական համարեց, որ այս իրավիճակից կարող են օգտվել երրորդ ուժերը, մասնավորապես ԱՄՆ-ը, որպեսզի այս հիմքի վրա կառուցեն իրենց աշխարհաքաղաքական ծրագրերը։ Միխեևը նկատեց, որ անտեղի է մեղադրել Ռուսաստանին՝ որպես միջնորդի, թե առաջընթաց չի գրանցվում: Նա ընդգծեց, թե միայն Ռուսաստանի հետ կարելի է 20 տարի «լյա-լյաներ անել». «Ռուսաստանը մեղավոր չէ, Ռուսաստանը կապ չունի, որ կողմերի դիրքորոշումները չեն համապատասխանում: Ասում են՝ կկանչենք ամերիկացիներին. կանչեք, առանց այն էլ նրանք տարածաշրջանում են: Կանչեք, եթե խաղաղություն չեք ուզում, քանզի ամերիկացիները սովոր են ամեն տեղ քաոս ստեղծել, մինչ օրս նրանք որևէ հակամարտություն չեն կարգավորել: Մենք և դուք նրանց համար փորձաճագարներ ենք»:
Ռազմավարական մշակույթի ռուսական հիմնադրամի փոխնախագահ Անդրեյ Արեշևն էլ արձագանքեց, թե ոչ ոք ամերիկացիներին չի կանչում, նրանք ինքներն են գալիս: Արեշևի խոսքերով, հակամարտության կարգավորման գործընթացում չպետք է մոռանալ նաև Իրանի և Չինաստանի հետաքրքրությունների մասին:
Երևանյան կողմից էլ արձագանքեց տեսակամրջի մասնակից, քաղաքագետ Կարեն Բեքարյանը՝ նշելով, որ ոչ ոք չի մեղադրում միջնորդին, ինչպես նաև միջնորդներին: Նա համաձայնեց Արեշևի հետ՝ ասելով, թե իրոք ամերիկացիներին ոչ ոք չի կանչել, պարզապես վերջիններս գալիս են՝ երբ ուզում են, քանզի աշխարհաքաղաքական իրավիճակն է այդպես թելադրում. «Ամեն դեպքում կոնֆլիկտի կարգավորման մոնոպոլացումը, ում կողմից էլ որ լինի, վտանգավոր է»:
Կոնֆլիկտում հետաքրքրություններ ունեցողների դերակատարությանն անդրադառնալով՝ Բեքարյանը նշեց, որ, չգիտես ինչու, միջնորդները և հենց Ռուսաստանը երբեք չեն խոսում Թուրքիայի վատ, ապակայունացնող ազդեցության մասին. «Ես հասկանում եմ, որ Թուրքիայի հետ Ռուսաստանը տնտեսական հարաբերություններ ունի, սակայն պետք է արձանագրել, որ Ադրբեջանի ապակառուցողական պահվածքում, թեկուզ հենց Կազանի հանդիպման ժամանակ, Թուրքիայի մատը խառն է»:
ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը ևս նշեց, որ ոչ ոք Ռուսաստանին չի մեղադրում, քանզի այստեղ մենք գործ ունենք կոնկրետ երկրների կոնկրետ շահերի հետ: Քաղաքագետը նկատեց, որ թե՛ Ռուսաստանը, թե՛ Եվրոպան և թե՛ Միացյալ Նահանգներն իրենց հետաքրքրություններն ունեն Հարավային Կովկասում:
