2013 թվականի հիմնական աշխատանքները վերաբերել են Առողջապահության համակարգի՝ 2013-2020 թվականների զարգացման հայեցակարգի մշակմանը: Այսօր տեղի ունեցած մամուլի ասուլիսի ժամանակ այս մասին ասաց ՀՀ առողջապահության նախարար Դերենիկ Դումանյանը:
«Այս տարի աշխատելու ենք բժշկական օգնության որակի բարելավման ուղղությամբ և պայքարելու ենք ստվերի, կոռուպցիայի դեմ: Երրորդ կարևոր ուղղությունը լինելու է առողջ ապրելակերպի ռազմավարության փաստաթուղթը կյանքի կոչելը: Բացի այդ, զեկույց ենք պատրաստել ծխելու դեմ պայքարի և դրա հետևանքների մասին: Ինչ վերաբերում է անցած տարի ստեղծված հիգիենիկ համաճարակային տեսչությանը, ապա այն վերահսկելու է բուժօգնության որակը, դեղորայքի շրջանառությունն ու բժշկական գովազդը»,- ասաց նախարարը:
Դերենիկ Դումանյանի խոսքով՝ համակարգում օպտիմիզացիայի է ենթարկվել տուբերկուլյոզային ծառայությունը:
«Որոշ միջոցառումներից հետո մենք կունենանք բավական որակյալ տուբերկուլյոզային համակարգ: Որոշակի առաջընթաց ունենք նաև պալիատիվ բժշկության ոլորտում. օնկոլոգիական կենտրոնում գործող այս բաժանմունքը բավական լավ է աշխատում: Մոր և մանկան առողջության պահպանման տեսանկյունից մանկական մահացության գծով 2013-ին գրանցվել են վերջին տարիների ամենաբարվոք ցուցանիշները: Այսուհետ այս ոլորտը լինելու է առողջապահական համակարգի առաջնահերթություններից մեկը: Անցած տարվա ընթացքում իրականացվել է նորածնային սկրինգ, ինչի արդյունքում բավական թվով հիվանդ երեխաների ենք հայտնաբերել»,- ասաց նա:
Առողջապահության նախարարը տեղեկացրեց, որ շինարարական աշխատանքների ընթացքում իրենք տնտեսել են 1 մլն 650 հազար դոլարին համարժեք դրամ:
«Այս գումարներով կառուցելու ենք ևս 6 ամբուլատորիաներ, 3-ը՝ Տավուշում, Ճամբարակի հիվանդանոցը, վերանորոգելու ենք 10 մեքենաներ՝ դրանք տրամադրելով սահմանային ամբուլատորիաներին: Նախատեսվածից 820 մլն ավելի դրամ ուղղվել է ամբուլատոր և ստացիոնար բուժօգնությանը:
Անցած տարվա մյուս կարևոր ձեռքբերումը եղել է հայրենական դեղարտադրողներին ցուցաբերվող օգնությունը: Կառավարությունն առաջին ագամ առողջապահության նախարարությանը թույլ տվեց դեղարտադրողից ուղիղ բանակցությունների միջոցով դեղորայք գնել: Դանիական մի ընկերությունից այդ ճանապարհով գնեցինք ինսուլին: Այժմ 10 մլ տարողությամբ սրվակը կարժենա 3 դոլար՝ նախկին 12 դոլարի դիմաց: Հավաստիացնում եմ, որ ինսուլինի կարիք ունեցող անձինք ապահովված են 100 տոկոսով: Սրա արդյունքում մենք զգալի տնտեսում կունենանք: Պայմանավորվածություններ ունենք նաև հոգեմետ դեղարտադրողների հետ: Հոգեմետ դեղորայքը ևս կտրամադրվի անվճար»,- ասաց նա:
Դերենիկ Դումանյանը տեղեկացրեց, որ 2013-ին իրենց հաջողվել է զգալիորեն կրճատել ստվերը: «2013 թվականի 10 ամիսների կտրվածքով վճարովի ծառայությունների մատուցումից ստացված եկամուտները, 2012 թվականի նույն ժամանակահատվածի համեմատ, աճել են 32.1 տոկոսով: Համավճարով ստացված եկամուտները կազմել են 1.265 մլն դրամ՝ անցած տարվա նույն ժամանակահատվածի համեմատ աճելով 47.9 տոկոսով:
«Բացի այդ, այս տարի աշխատանքի ենք տեղավորել 57 սիրիահայ բժիշկների, որնցից մի քանիսը համաձայնել են աշխատանքի անցնել մարզերում: Նաև հայտ ենք ներկայացրել՝ անդամակցելու Առողջապահության ազգային ինստիտուտների համաշխարհային խորհրդին»,- տեղեկացրեց նախարարը:
Դերենիկ Դումանյանի խոսքով՝ 2014-ին գերակա են հետևյալ խնդիրները՝ կոռուպցիայի դեմ պայքար, առողջապահական համակարգի որակի բարելավում, մարզերի բուժհաստատությունների կառուցում և վերանորոգում, ոչ ինֆեկցիոն հիվանդությունների՝ սիրտ-անոթային, օնկոլոգիական և շաքարային դիաբետի, սկրինինգային ծրագրեր: Նախատեսվում է համաշխարհային չափանիշներին համապատասխան ոսկրածուծի փոխպատվաստման կենտրոն ստեղծել:
Լուսանկարը՝ Photolure-ի
