Հունվարի 20-ին՝ Հրանտ Դինքի սպանության 7-րդ տարելիցին, ցանցահենների կողմից հարձակման է ենթարկվել «Ակոս»-ի կայքէջը: Այս մասին տեղեկացնում է ֆրանսիական «Յառաջ» պարբերականը:
Քեմալ Աթաթուրքի նկարին կից այնտեղ զետեղվել է հետևյալ գրությունը. «Հարձակում ՍԵՐԲԵՐՈՒՍ-ի կողմից: Դեռ կա՞ մեկը, որ տալիս է Հրանտի անունը: «Թուրքից թափվող այդ թունավոր արյունը փոխարինելու կոչված մաքուր արյունը գտնվում է հային Հայաստանի հետ կազմելիք ազնիվ երակի մեջ: 2004, փետրվարի 13. Հրանտ Դինք»:
Սերբերուս Ռեիսն ասում է՝ մենք ձեր այս խոսքերը չենք մոռացել, չենք թողնի, որ մոռացվեն: Եթե նույնիսկ միայն մեկ թուրք մնա աշխարհի վրա, ձեզ պիտի հալածի. սա մի՛ մոռացեք: ՀԱՅՐԵՆԻՔԻ ՀԱՐՑ Է:
JusTic4.- Երանի՜ նրան, որ ասում է՝ թուրք եմ:
Joedalton.- Եկանք լսելի դարձնելու մեր ձայնը»:
Այժմ կայքէջը վերսկսել է բնականոն աշխատանքը: «Ակոս»-ը որոշել է բողոք ներկայացնել իր փաստաբանների միջոցով: