«Առաջին լրատվական»-ի խմբագրություն դիմած քաղաքացի Սևակ Մարաբյանն ահազանգում է, որ Հայաստանում դատական ակտերը չեն կատարվում, դատարանի վճիռը պետական մարմինների, մասնավորապես, ՀՀ ճանապարհային ոստիկանության կողմից անտեսվում ու արհամարհվում է։ 2015 թվականի հոկտեմբերի 25-ին Չարենցավան քաղաքի եկեղեցու մոտ գտնվող խաչմերուկում վթար է տեղի ունեցել։ Իրար են բախվել «Մերսեդես Բենց» և «ՎԱԶ 2106» մակնիշի մեքենաները։ Վթարի առաջացումը պայմանավորված է եղել խաչմերուկում երթևեկության կարգը, այն է՝ խաչմերուկի անցման հաջորդականությունը ճանապարհային նշանների տեղադրությամբ միանշանակ կերպով սահմանված չլինելու հանգամանքով: Մասնավորապես, խաչմերուկում հատվող փողոցները ոչ բոլոր կողմերից են կահավորված եղել առավելության ճանապարհային նշաններով: Այդ հանգամանքները, ինչպես նաև վթարի մասնակից վարորդների անմեղությունը հաստատվել է ինչպես փորձագետի եզրակացությամբ, այնպես էլ դատական ակտով: Տվյալ դեպքում տրանսպորտային միջոցներին պատճառված վնասը ենթակա է հատուցման, այն պետք է հատուցի ճանապարհային նշաններ տեղադրելու պարտականություն կրող ճանապարհային ոստիկանությունը՝ արտաբյուջետային հաշվից: Եվ ըստ օրինական ուժի մեջ մտած դատական ակտի՝ բավարարվել է Սևակ Մարաբյանի կողմից ներկայացված հայցը և ճանապարհային ոստիկանությունից բռնագանձվել է 1 մլն 772 հազար 500 դրամ՝ որպես պատճառված վնասի փոխհատուցում։
Սևակ Մարաբյանը, անցնելով դատական համակարգի բոլոր փուլերով, իր ձեռքի տակ ունենալով դատարանի օրինական ուժի մեջ մտած վճիռը, մինչ այսօր չի կարողանում ճանապարհային ոստիկանությունից ստանալ իրեն պատճառված վնասի փոխհատուցումը։ Մեզ հետ զրույցում քաղաքացին տեղեկացրեց, որ դիմել է տարբեր կառույցների, նամակ է ուղարկել ոստիկանության պետ Վալերի Օսիպյանին, դիմել է ճանապարհային ոստիկանության պետ Եգոր Կարապետյանին, սակայն մինչ այսօր ոչ մի արդյունք։ Իսկ դատական ակտերի հարկադիր կատարման ծառայությունից տեղեկացրել են, որ արգելանք են դրված ճանապարհային ոստիկանության ՀՀ առևտրային բանկերում ունեցած հաշիվների վրա, սակայն դրամական միջոցներ չի հայտնաբերվել, իսկ պետական մարմնի գանձապետական հաշիվների և գույքի վրա արգելանք չեն կարող դնել: Բացի դրանից՝ քաղաքացուն պատասխանել են, որ ճանապարհային ոստիկանությունը գումար չունի վճարելու համար։
Ստացվում է՝ ճանապարհային ոստիկանության անգործության պատճառով քաղաքացուն հասցվել է վնաս, որի փոխհատուցման վերաբերյալ կա դատարանի օրինական ուժի մեջ մտած վճիռ և որը չի կատարվում պետական մարմինների կողմից։ Իսկ ինչպես հայտնի է, դատական ակտերը պարտադիր են բոլորի համար և ենթակա են պարտադիր կատարման։
Քանի որ դատական ակտը պաշտոնատար անձանց կողմից չկատարելու համար քրեական պատասխանատվություն է նախատեսված, քաղաքացի Սևակ Մարաբյանը դիմել է ՀՀ գլխավոր դատախազություն և պահանջել է հիմքերի առկայության դեպքում քրեական գործ հարուցել։