Վրացական GHN լրատվական գործակալության փոխանցմամբ՝ ՄԱԿ-ի աշխատանքային խմբի ներկայացուցիչները վրացական իշխանություններին կոչ են արել դադարեցնել ապօրինի ձերբակալություններն ու իր քաղաքացիների նկատմամբ դաժան վճիռների կայացումը։ Այս մասին նշված է ՄԱԿ-ի կոմյունիկեում։
ՄԱԿ-ը հայտարարել է, որ Վրաստանում ինքնակամ ձերբակալությունները դարձել են սովորական երևույթ, իշխանությունները չեն երաշխավորում ձերբակալվածների նվազագույն իրավունքների պահպանումը։ Բացի այդ, նրանք ամբողջովին բացառում են գրավի դիմաց ազատարձակման հնարավորությունը։
ՄԱԿ-ի աշխատանքային խմբի ներկայացուցիչ Հաջի Մալիկ Սոուն հայտարարել է, որ Վրաստանում հարուցված քրեական գործերի 90 տոկոսն ավարտվում է ոչ դատական ընթացակարգով, առանց դատավորների միջամտության, քանի որ մինչ դրան հասնելը ձերբակալվածներին ստիպում են ճանաչել իրենց մեղքը։
ՄԱԿ-ի փորձագետների տվյալներով՝ Վրաստանում չափազանց ցածր է արդարացնող դատավճիռների քանակը՝ 0.1 տոկոս։ Դա նշանակում է, որ մեղադրյալների մեծ մասը հայտնվում է բանտում։ ՄԱԿ-ի փորձագետներին վրաց բանտարկյալները պատմել են, թե իրենք վախեցել են, որ եթե դատական գործընթացի ժամանակ չճանաչեին իրենց մեղքը, ապա առավել տևական ժամկետով կդատապարտվեին։
ՄԱԿ-ի փորձագետների խումբը Թբիլիսիում, Բաթումում ու Քութայիսում այցելել է 11 բանտեր և ուղղիչ հիմնարկներ և հարցուփորձ արել 158 բանտարկյալների։
Հիշեցնենք, որ Վրաստանի վիճակագրական կազմակերպության տվյալներով, 2011 թվականի ապրիլին Վրաստանի բանտարկյալների ընդհանուր թիվը եղել է 22,193, նրանցից 162-ը՝ անչափահասներ, իսկ 1000-ը՝ կանայք։ 2010 թվականին Վրաստանի բանտարկյալների թիվը գերազանցել է 23,800-ը։
