ԱՄՆ Հյուսիսարևմտյան համալսարանի մասնագետները հետազոտել են այնպիսի երևույթ, ինչպիսին «տրոլլինգն» է, և եկել են եզրակացության, որ անանունությունն ինտերնետ օգտատերերին հաղորդում է էյֆորիայի զգացում, որը հավասարազոր է ալկոհոլային հարբածության կամ իշխանություն ունենալու զգացումի հետ: Այս մասին գրում է The Wall Street Journal-ը:
Գիտնականները պարզել են. այս առանձնահատկությունը հանգեցնում է նրան, որ բանավեճի մասնակիցն ինտերնետում ավելի ազատ է, և հաճախ «արգելակները չեն գործում», ինչը հանգեցնում է քննարկումների թեժացմանը, ավելի սուր կարծիքների արտահայտմանը: Մյուս կողմից, այդ մարդիկ ավելի են հակված այլ ինտերնետ օգտատերերի կողմից մանիպուլյացիայի ենթարկվելուն:
Գիտնականների կարծիքով՝ այս հետազոտությունների արդյունքները թույլ կտան մոտենալու այն հարցի պարզաբանմանը, թե ինչու են ինտերնետային քննարկումների անանուն մասնակիցները համարվում ամենասուր կարծիքներ արտահայտողները:
«Տրոլլինգը» նոր ներմուծված եզր է, որն իրենից ներկայացնում է մի երևույթ, երբ օգտատերերից մեկը կամ մի քանիսը սադրիչ կամ կոշտ հայտարարություններ են անում՝ ուղղված քննարկման մասնակիցների միջև հակասությունների և հակամարտությունների առաջացմանը: