Ազատամարտիկ Սեպուհ Ստեփանյանը (Ռեմբո) «Առաջին լրատվական»-ի հետ զրուցելով Զինված ուժերի 22-ամյակից, նշեց, որ երբ իրենց կողքին չէ իրենց մարտական ընկեր Վոլոդյա Ավետիսյանը, իրենց տոնը տոն չէ:
«Մի կողմից ոգեշնչված ենք, ուրախանում ենք, մի կողմից էլ տեսնում ենք, որ կառավարությունը մեր հորդորներին ուշադրություն չի դարձնում: Բայց չէ՞ որ պիտի միասին լինեն թե՛ կառավարությունը, թե՛ ազատամարտիկը:
Մենք պատերազմական գոտում ենք, պատերազմը դեռ չի ավարտվել, իսկ մեր տղաները առաջին ծիծեռնակներն էին, որոնցից մեկն էլ Վոլոդյա Ավետիսյանն է: Այսօր կառավարությունը իր առաջին ծիծեռնակներին եթե լավ չի նայում, վաղը ո՞նց պիտի անի: Մենք ինչ կարողացել, տվել ենք մեր հայրենիքին. մեր կյանքը, առողջությունը, բայց չէ՞ որ պետք է արժանապատվորեն ապրենք»,- ասաց նա:
Ազատամարտիկը շնորհավորեց բանակի տարեդարձը՝ նշելով, որ հպարտ է՝ այսօր ունենք կայունացած բանակ: Նա հիշեց նաև հունվարի 20-ի դեպքերը և ասաց, որ Արմեն Հովհաննիսյանի կեցվածքը իսկական հայորդուն է վայել. «Այդպիսի բաներից մի տեղ ուրախանում ենք, մի տեղ էլ թաքուն լաց լինում. Ինչքա՜ն ափսոս էր այդ տղան»:
