Վերաքննիչ դատարանը կայացրեց Ռոբերտ Քոչարյանի գործով նոր վճիռ, որը նախորդից տարբերվում է նրանով, որ Ռոբերտ Քոչարյանը կալանավորվելու է: Վերաքննիչը գործի նոր քննություն իրականացրեց այն բանից հետո, երբ Վճռաբեկը բավարարեց կալանքը չեղարկելու մասին Վերաքննիչ դատարանի առաջին որոշման բողոքարկումը, դատավճիռն ուղարկելով վերաքննության: Եվ ահա, դեկտեմբերի 7-ին Վերաքննիչ դատարանը որոշեց, որ Ռոբերտ Քոչարյանին կալանավորելու Ընդհանուր իրավասության դատարանի որոշումը պետք է մնա ուժի մեջ, և երկրորդ նախագահը պետք է կալանավորվի: Այս դատավճիռը կայացվում է նախընտրական գործընթացի վերջին օրը, հետաքրքիր զուգադիպությամբ: Նույն հետաքրքիր զուգադիպությամբ էլ դատավճռից առաջ տարածվում է ԱԱԾ պետի և վարչապետի գաղտնալսման ձայնագրությունը, կամ ավելի շուտ հայտնի ԱԱԾ-ՀՔԾ պետերի ձայնագրության «երկրորդ մասը», որտեղ արդեն վարչապետն է, և քննարկվում է Քոչարյանի գործը:
Ռոբերտ Քոչարյանի փաստաբաններն ու նրան հարող տեղեկատվական շրջանակները անմիջապես հայտարարեցին, որ դա վկայում է դատական համակարգի վրա ճնշման մասին: Այսօր կալանավորման մասին որոշումից հետո էլ Ռոբերտ Քոչարյանի փաստաբան Ռուբեն Սահակյանը հայտարարել է, որ դատարանի վրա ճնշում է եղել: Մյուս կողմից, հատկանշական էր այդ առիթով Նիկոլ Փաշինյանի հայտարարությունը հայտնի մեծ հեռուստաբանավեճում, երբ ի պատասխան Վիգեն Սարգսյանի մեղադրանքի նա հայտարարեց, որ դատարանի վրա ճնշում և միջամտություն լինելու դեպքում նախկին իշխանության 90 տոկոսը, այդ թվում գուցե նաև հենց Վիգեն Սարգսյանը կլինեին կալանքի տակ: Այս ամենով հանդերձ, սակայն, միանգամայն սպասելի է, որ նախկին իշխանությունը, տվյալ դեպքում Ռոբերտ Քոչարյանն ու նրա թիմը, անկախ ամեն ինչից, պետք է հայտարարեին, որ տեղի է ունենում քաղաքական հետապնդում: Տարօրինակ կլիներ, եթե նրանք խոստովանեին, որ իրենց հանդեպ իրավական պատասխանատվության գործընթացը հիմնավոր է, քանի որ եղել է Մարտի 1 և գանձագողություն հենց իրենց քաղաքական իշխանության շրջանում:
Սրան զուգահեռ, անկասկած է, որ Ռոբերտ Քոչարյանի կալանավորումը հավելյալ հանրային աջակցություն կապահովի Նիկոլ Փաշինյանի և «Իմ քայլը» դաշինքի համար, հատկապես այն շրջանակներից, որոնք պահանջում են նախկին համակարգի հանդեպ ավելի կոշտ քայլեր: Իսկ այդպիսի շրջանակ կա և այստեղ հետաքրքիր է, որ հենց այդ շրջանակի ձայների համար էր ավելի շատ աշխատում «Սասնա ծռեր» կուսակցությունը, և այդպիսով ստացվում է, որ Քոչարյանի կալանավորումը կարող է որոշակիորեն նվազեցնել այդ ուժի հնարավոր ձայները: Իհարկե, ծիծաղելի կլինի մտածել, որ դա է կալանավորման շարժառիթը: Մենք այս իմաստով քննարկում ենք ուղղակի հնարավոր քաղաքական ազդեցությունները առկա իրավիճակում: Որովհետև, ի վերջո, հանրային և պետական շահի տեսանկյունից առանցքայինն այլ բան է, տվյալ դեպքում նախկին իշխող համակարգի ժամանակաշրջանում հանրության ու պետության դեմ կատարված հանցագործությունների լիարժեք բացահայտում, և այս առումով, տվյալ պարագայում հանրության համար գլխավոր խնդիրը Քոչարյանի կալանքի տակ լինել-չլինելը չէ, դա ամենևին նպատակ չի կարող լինել հանրության համար, այլ կարող է դիտվել միջոց՝ ամբողջությամբ բացահայտելու Մարտի 1-ի հանցագործությունը, իսկ գուցե նաև այլ անօրինականություններ: Դրանից հետո արդեն դատարանը պետք է որոշի, թե որտեղ պետք է լինի Ռոբերտ Քոչարյանը կամ որևէ այլ պաշտոնյա ավելի երկար ժամանակով:
