ՀԺԿ առաջնորդ Ստեփան Դեմիրճյանը, «Դե ֆակտո» ակումբում այսօր հրավիրված մամլո ասուլիսում անդրադառնալով իշխանություն-ընդդիմություն երկխոսության հարցին, ասաց, որ պետք է սկսել արդար ընտրությունների անցկացումից, քանի որ ընտրությունները մեր երկրում, որպես կանոն, կեղծվում են։ «Մարդիկ չեն հավատում հերթական ընտրություններին: Արմատական փոփոխություններ իրագործելու համար երկրում պետք է արդար ընտրություններ անցկացվեն: Իշխանությունները ինչ-որ քայլերի կգնան հասարակական ճնշման ներքո: Հուսով ենք, որ իշխանությունները քայլերի կգնան, դեռ ժամանակ կա, որ նրանք ինչ-ինչ հետևություններ անեն»,- նշեց Ս.Դեմիրճյանը՝ հավելելով, որ քաղաքակիրթ երկխոսությունը սկսվում է քաղաքակիրթ ընտրություններից:
Հասարակությանը չեն հետաքրքում հերթական ընտրությունները՝ նկատեց ՀԺԿ առաջնորդը. «Մենք ուզում ենք, որ հնարավորինս անցնցում անցնեն փոփոխությունները մեր երկրում: Արտահերթ ընտրությունները սկզբունքային հարց են: Մեկ օր էլ շուտ անցկացվեն արտահերթ ընտրություններ՝ դա սկզբունքային է»:
Ինչո՞ւ եք վստահ, որ արտահերթ ընտրությունները չեն կեղծվի՝ հարցրին լրագրողները։ «Շատ երկրներում, երբ նորմալ ընտրություններ են անցկացվում, իրավիճակը թելադրում է արտահերթ ընտրությունների անցկացնում: Արտահերթ ընտրությունների անցկացումը հոգեբանական հարց է»,- նկատեց Ս.Դեմիրճյանը: Ըստ նրա՝ հերթական թե արտահերթ՝ եթե նորմալ ընտրություններ լինեն՝ կընդունվեն, իսկ միակ ճանապարհը սահմանադրական ճանապարհն է, և եթե հիմա շատերն են գիտակցում դրա արդարացիությունը՝ միայն ողջունելի է:
Եթե սպասելու լիմիտը սպառվի, և երկխոսությունը չկայանա՝ որո՞նք են լինելու ՀԱԿ-ի քայլերը։ «Հասարակական ճնշումն է որոշիչը: Եթե երկրում նորմալ ընտրություններ չեն անցկացվում՝ դա չպետք է ընդդիմության ձախողումը համարել, դա երկրի ձախողումն է»,- նկատեց Ստեփան Դեմիրճյանը: