Թուրքիայում երկրի վարչապետ Ռեջեփ Թայիփ Էրդողանի որդուց բացի՝ կոռուպցիոն սկանդալում ներգրավվել է նաև նրա դուստրը՝ Սումեյա Էրդողանը: Այս մասին հաղորդում է haqqin.az-ը՝ վկայակոչելով տեղի ԶԼՄ-ները:
Հետաքննության ձեռքին են հատնվել վարչապետի դստեր հեռախոսային բանակցությունները գործարար Մուստաֆա Թոփբաշի հետ: Այդ խոսակցության համաձայն՝ գործարարը Իզմիրում կառուցել է 8 առանձնատուն, սակայն տեղի նահանգապետը շինարարությունը համարել է անօրինական և կարգադրել է քանդել դրանք: Այն բանից հետո, երբ ձեռնարկատերն այս հարցով դիմել է վարչապետի դստերը, նահանգապետը զրկվել է պաշտոնից:
Համացանցում հրապարակվել է նաև Սումեյայի երկրորդ հեռախոսազրույցը գործարարի հետ, որից պարզ է դառնում, որ վարչապետի դուստրը, որպես նվեր, Թոփբաշից ստացել է երկու առանձնատուն:
Սումեյա Էրդողանը գործարարին ասել է, որ ինքը և մայրը շատ են հավանել երկու առանձնատուն: Նա խնդրել է նաև, որպեսզի լողավազանի առաջ պատ շարեն, որպեսզի հարևանները չկարողանան տեսնել լողացողներին:
