Իսրայելի վարչապետ Բենյամին Նաթանյահուի եւ Պաղեստինի Ինքնավարության նախագահ Մահմուդ Աբբասի միջեւ կայանալիք բանակցությունները, որոնք պետք է տեղի ունենային Փարիզում, ԱՄՆ-ի պետքարտուղար Հիլարի Քլինթոնի եւ Եգիպտոսի նախագահ Հոսնի Մուբարաքի մասնակցությամբ, անժամկետ հետաձգվել են: Իսրայելական աղբյուրները հիշեցնում են, որ բանակցությունների հաջորդ փուլը կլինի ոչ շուտ, քան ԱՄՆ-ի Կոնգրեսի միջանկյալ ընտրությունները, որոնք կկայանան նոյեմբերի սկզբին, եւ ոչ ուշ, քան Բարսելոնայում կայանալիք Միջերկրածովյան երկրների գագաթաժողովը:
Շաբաթ օրը Իսրայելի կառավարությունը հայտարարեց, որ պատրաստվում է պաղեստինյան տարածքներում մոտ 240 բնակարան կառուցելուն: Պաղեստինա-իսրայելյան վերջին բանակցությունները նախաձեռնած ԱՄՆ-ն ու Ֆրանսիան իրենց դժգոհությունն են արտահայտել այս կապացությամբ: Նրանք ամեն կերպ փորձում էին համոզել Իսրայելի վարչապետին, որպեսզի պաղեստինյան տարածքներում շինարարության արգելքը երկարեցվի եւս 60 օրով, քանի դեռ շարունակվում էին բանակցությունները: Սակայն դա տեղի չունեցավ, եւ հիմա շատերը կարծում են, որ բանակցությունների ընթացքն այլեւս դժվար է վերահսկել եւ պաղեստինցիներին համոզել, որպեսզի շարունակեն դրանք:
