Առաջիկա արտահերթ խորհրդարանական ընտրությունների քարոզարշավի մեկնարկից առաջ խոսվում էր քարոզարշավի բովանդակության մասին. որքանո՞վ է այն ազդում քաղաքացիների տրամադրությունների վրա և որքանո՞վ է ուղղորդում նրանց՝ ընտրության հարցում. «Առաջին լրատվական»- ի հետ զրույցում քաղտեխնոլոգ Վիգեն Հակոբյանը, անդրադառնալով այս հարցին, նշեց. «Թե՛ ընտրարշավից առաջ, թե՛ հիմա, գլխավոր խնդիրն այն էր, թե իշխանությունն ինչ մարտավարություն կընտրի՝ այսինքն՝ դա կլինի «սևի» ու «սպիտակի» տրամաբանությամբ, թե՞ բարիկադներ քանդելու մասին կարգախոսի ներքո: Հենց դրանից էր բխելու, թե ինչ վարքագիծ են ընտրելու և արդյո՞ք նման պայմաններում դրսևորվելու հնարավորություն են ունենալու այն քաղաքական ուժերը, որոնք չեն տեղավորվում այլ գունային գամմաներում:
Առաջին 5 օրվա ընթացքում տեսանք, որ թե՛ նոր իշխանությունները, թե՛ ՀՀԿ-ն ընտրել էին նույն մարտավարությունը՝ «սևի» ու «սպիտակի» պայքար: Նոր իշխանությունը, դիրքավորվելով սպիտակ դաշտում, ՀՀԿ-ին թիրախավորել է սև դաշտում, իսկ ՀՀԿ-ն ընդունում է իր «սև» լինելը՝ փորձելով գրավել այն ընտրազանգվածին, որը դեմ է այսօրվա իշխանությանը, և ինչպես իրենք են ասում՝ մտահոգ է: Այս երկու բևեռները այս օրերին զբաղված էին իրար քննադատելով, լեզվակռիվներ եղան, վիրավորանքներ հնչեցին:
Երկրորդ հարթության մեջ հայտնվեցին այն ուժերը, որոնք չեն տեղավորվում «սևի» ու «սպիտակի» դաշտում: Նրանց խնդիրն է՝ գտնել գլխավոր առանձնահատկությունները, որոնցով իրենք կտարբերվեն մյուս ուժերից, որոնց շնորհիվ «սևի» ու «սպիտակի» դաշտից փախչող ընտրողները կընտրեն իրենց»:
Վ. Հակոբյանի դիտարկմամբ՝ այն, որ երկու հիմնական խաղացողների նախընտրական պայքար է, ձեռնտու է ՀՀԿ-ին: Նրա խոսքով՝ ռևանշի հարցը բարձրացնելը օգուտ է տալիս միայն ՀՀԿ-ին:
Կառավարման մասնագետ Սերոբ Անտինյանն ընդգծեց, որ իր համոզմամբ՝ հեղափոխությունը շարունակվում է, և այս ընտրությունները պետք է բորոշել որպես հեղափոխության դե յուրե ամրագրման հանգուցային փուլ: «Հեղափոխությունը շարունակվում է, հեղափոխական ուժը գնում է դե յուրե ամրագրման և իր ռեսուրսի ինստիտուցիոնալացման առաջիկա ԱԺ-ում: Այս պարագայում պայքարը գնում է հեղափոխական և հեղափոխությամբ մերժված քաղաքական ուժերի միջև, չունենք մաքուր ընտրական քաղաքական գործընթաց, որտեղ պայքարը կլիներ ծրագրային, գաղափարական դաշտում»:
Մանրամասն՝ տեսանութում:
