Այն մարդիկ, որոնք Հայաստանին հետեւում են Սփյուռքից, ֆեյսբուքից, յութուբից, իրենք գիտեն թե ամեն ինչ փոխվել է, էլ մարդիկ չեն ուզում ընտրությունների ժամանակ փող վերցնել, էլ փող տվողներ չկան, թաղային խուժան չկա: Այս մասին Լոռու մարզում նախընտրական քարոզչության շրջանակներում տեղի ունեցած հանդիպման ժամանակ նշեց «Լուսավոր Հայաստան» կուսակցության ցուցակը գլխավորող Էդմոն Մարուքյանը:
Նա նշեց, որ 2017 թվականի ապրիլին կայացած ընտրություններում զանգվածային փողաբաժանումների, թաղային խուժանի գործողությունների հետեւանքով ՀՀԿ-ն ստացել էր 62 տոկոս ձայն. «Հիմա մենք էլի եկել ենք Վանաձոր ու մարդիկ մեզ ասում են՝ զգույշ եղեք, Լոռու մարզում ՀՀԿ-ն շատ ուժեղ աշխատում է, շատ ձայն է տանելու: Ժողովուրդ ջան, ի՞նչ հանրապետական, նրանք պետք է Լոռու մարզից ձայն տանե՞ն: Հիմա ասում են՝ թալանել են եւ այլն: Ես ասում եմ՝ ով թալանել էր, առաջադրվել էր ու էլի ընտրվել էր: Էլի է առաջադրվել ու էլի է ուզում ընտրվի: Ո՞րն է ձեր պատասխանն իրենց: Մենք այստեղ ենք մի ուղերձով, Լոռու մարզը պետք է ցույց տա, որ սկզբունքային դիրքորոշում ունի տեղի ունեցած փոփոխությունների նկատմամբ: Հեղափոխությունն ունի իր կանոնրը, հեղափոխական ուժը պետք է լինի առաջինը, իսկ երկրորդը պետք է լինի «Լուսավոր Հայաստանը» իր անցած ճանապարհով»,-ընդգծեց Մարուքյանը:
