Կերչի նեղուցում Ուկրաինայի ռազմածովային ուժերին պատկանող երեք նավերի մասնակցությամբ տեղի ունեցած միջադեպին իրենց գնահատականն են տվել ՌԴ նախագահի գրասենյակն ու արտաքին գործերի նախարարությունը:
«Դա շատ վտանգավոր սադրանք էր, որը հատուկ ուշադրություն և պարզաբանում է պահանջում»,- ՌԴ նախագահի մամուլի խոսնակ Դմիտրի Պեսկովի խոսքը փոխանցել է russian.rt.com-ը:
ՌԴ ԱԳ նախարար Սերգեյ Լավրովը միջադեպը Կիևի կողմից սադրանք է անվանել և նշել, որ Ուկրաինան խախտել է միջազգային իրավունքի նորմերը և սպառնալիք ստեղծել Կերչի նեղուցի շրջանում նավերի տեղաշարժի համար, գրում է interfax.ru-ն:
ՌԴ ԱԳՆ ղեկավարը կոչ է արել Արևմուտքի երկրներին Կիևին հետ պահել իրավիճակի հետագա սրումից: «Խստորեն կոչ ենք անում Կիևի արևմտյան հովանավորներին սանձել բոլոր նրանց, ովքեր փորձում են ռազմական հիստերիայի ֆոնին քաղաքական միավորներ շահել սպասվող ընտրությունների հետ կապված»,- ասել է Լավրովը:
ՌԴ Անվտանգության դաշնային ծառայությունը նոյեմբերի 25-ի առավոտյան հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվել է, որ երեք ուկրաինական նավերը դեպի Կերչի նեղուց են շարժվել՝ նավերի անցման համար համապատասխան դիմում չներկայացնելով: Արդյունքում ռուսական սահմանապահ նավը վնասել է ուկրաինական քարշակին, իսկ Կերչի նեղուցի տարածքը վերահսկվում է ռուսական Սու-25 օդանավերի կողմից:
