«Ջանասիրաբար աշխատելու ունակությունն է, որ ինձ քաղաքացիական հասարակությունից տարել է դեպի քաղաքականություն. աշխատանքն է, որ տալիս է որակ և արդյունք»,- «Առաջին լրատվական»- ի հետ զրույցում այս մասին ասաց «Լուսավոր Հայաստան» կուսակցության Կառավարման խորհրդի փոխնախագահ, պատգամավորության թեկնածու Մանե Թանդիլյանը՝ հավելելով, որ յուրաքանչյուր քաղաքական գործիչ պետք է պահպանի հասարակության հետ կապը, ինչը կենսական անհրաժեշտություն է որակյալ աշխատանք կատարելու համար, այլապես անիմաստ է քաղաքականությամբ զբաղվելը:
Թանդիլյանի դիտարկմամբ՝ հին ուժերը ձախողվել են և կապ չունեն հասարակության հետ, և նոր Հայաստանում պետք է ներկայություն ունենան այնպիսի մարդիկ, ովքեր կապ չեն ունեցել նախորդ համակարգի, անցյալի պարտությունների ու ձախողումների հետ: «Մեր անբիծ անցյալը և մեր գործունյա ներկան դեկտեմբերի 9-ին պետք է կողմնորոշիչ լինի քաղաքացիների համար:
Անդրադառնալով ՀՀԿ կարգախոսին՝ «Եթե մտահոգ ես, ընտրի՛ր ՀՀԿ-ին», Մ. Թանդիլյանը նշեց, որ մտահոգներն արդեն մերժել են ՀՀԿ-ին, որոնք ձախողել էին ամեն ինչ: Նրա խսքով՝ ԼՀԿ կարգախոսում՝ «Լուսավորի՛ր Հայաստանը», կա գաղափարախոսություն. «Մեր կուսակցությունը ստեղծվել է լուսավորչական գաղափարախոսության հիման վրա, որտեղ մարդը բարձրագույն արժեք է, մարդը նպատակ է, ոչ թե միջոց: Մարդը մեր ծրագրերի կենտրոնում է: Մեր կուսակցությունը լուսավորչական գաղափարախոսությամբ Հայաստանն առաջ է տանելու դեպի զարգացում»:
Անդրադառնալով նախընտրական քարոզարշավին՝ Թանդիլյանն ընդգծեց, որ իրենց քարոզարշավը պետք է առանձնանա պոզիտիվ ագրեսիվությամբ:
Նա նաև հույս հայտնեց, որ նոր ձևավորվող քաղաքական դաշտում հայ կանայք պետք է դառնան որոշում կայացնողներ:
Մանրամասն՝ տեսանյութում:
