Հինգշաբթի ՄԱԿ-ի գլխավոր քարտուղար Պան Գի Մունը դիմել է Եգիպտոսի ժողովրդին՝ հեղափոխության երրորդ տարելիցի կապակցությամբ, որը վերջ դրեց երկրում նախագահ Հոսնի Մուբարաքի 30-ամյա կառավարմանը: Ինչպես հաղորդում է ITAR-TASS-ը, Պան Գի Մունը եգիպտացիներին կոչ է արել հրաժարվել բռնությունից և հաստատել, որ իրենք հակված են խաղաղ երկխոսության:
«Հեղափոխությունները և քաղաքական տրանսֆորմացիաները բարդ երևույթներ են, որոնք կարող են տևել տարիներ: Խաղաղ և ժողովրդավարական Եգիպտոսը այն է, ինչին արժանի է երկրի ժողովուրդը, և ինչը ծայրահեղ կարևոր է Հյուսիսային Աֆրիկայի, Մերձավոր Արևելքի համար, ինչպես նաև դրանց սահմաններից դուրս»,- ասվում է հայտարարության մեջ:
ՄԱԿ-ի գլխավոր քարտուղարը վստահ է, որ Եգիպտոսի ժողովուրդը, որն անցած ամառ կրկին վերապրեց իշխանափոխություն, պետք է կենտրոնանա պյուրալիստական քաղաքացիական հասարակության կառուցման վրա:
