Մայրաքաղաքում կառուցապատողները պետք է պահպանեն շինհրապարակների կազմակերպման համար սահմանված անհրաժեշտ նորմերը, կառուցապատողը պարտավոր է շինարարությանը հարող տարածքում քաղաքացիների համար հարմար ու անվտանգ անցուդարձ ապահովել: Այսպիսի պահանջ է դրվել Երևանի քաղաքապետ Կարեն Կարապետյանի կողմից հերթական աշխատանքային խորհրդակցության ընթացքում. «Կառուցապատողներից պետք է պահանջել շինարարական նորմերի պահպանում, որպեսզի Երևանի ու երևանցիների համար անհարմարություններ չստեղծեն»,- շեշտել է քաղաքապետը:
Վարչական շրջանների ղեկավարներին հանձնարարվել է խստորեն հետևել այդ նորմերի պահպանման պարտավորության ապահովմանը:
Մայրաքաղաքի փողոցների և մայթերի հարակից տարածքներում աղբահանությունը պատշաճ իրականացնելու նպատակով, բոլոր վարչական շրջաններին ավելի քան 1900 աղբարկղեր են հատկացվել:
Շարունակելով աղբահանության կազմակերպման թեման, Կարեն Կարապետյանը հանձնարարել է մինչ աղբահանության մրցույթի հայտարարելը և համակարգի կառավարումը նոր օպերատորներին հանձնելը, կարգավորել պայմանագրային դաշտը և ապահովել հավաքագրումների ցուցանիշը:
Կարեն Կարապետյանը մեկ անգամ ևս շեշտադրել է գույքահարկի և հողի հարկի համար գանձվող վարձավճարների հավաքագրումն ավելի արդյունավետ կազմակերպելու հարցը:
Անդրադառնալով քաղաքապետարանի այս տարվա ծրագրերով նախատեսված շինբարեկարգման աշխատանքների իրականացմանը՝ քաղաքապետի կողմից հետևողականության պահանջ է դրվել բարեկարգման աշխատանքները սահմանված ժամկետներում կատարելու մասով:
Բարեկարգման ծրագրի շրջանակում, հանձնարարվել է նաև գույքագրել և ընդհանուր գնահատական տալ մայրաքաղաքի ստորգետնյա անցումների այսօրվա վիճակի վերաբերյալ:
Մայրաքաղաքի կանաչ տարածքների, սիզամարգերի ու լանդշաֆտների խնամքն ապահովելու նպատակով՝ Կարեն Կարապետյանը հանձնարարել է գույքագրել ոռոգման ցանցի անհրաժեշտություն ունեցող տարածքները և տալ ֆինանսական գնահատական. «Մայրաքաղաքում կանաչապատման աշխատանքները պետք է տեսանելի լինեն և այդ ուղղությամբ պետք է ունենալ հստակ կիրառական ծրագիր»,- նշել է քաղաքապետը:
Հանձնարարվել է նաև լուրջ ուշադրություն դարձնել այգիների և պուրակների կանաչ տարածքների խնամքին: Ուժեղացնել վերահսկողությունը հատկապես վարձակալությամբ տրված տարածքների ուղղությամբ:
Երևանի արտաքին տեսքի բարեկարգման շրջանակում, «Երևանջուր», «Երևանգազ» և «Հայաստանի էլեկտրական ցանցեր» ընկերություններին հանձնարարվել է ջրամատակարարման պոմպակայաններում, էլեկտրամատակարարման ենթակայաններում և գազաբաշխիչ կետերում ապահովել սանիտարական պատշաճ վիճակ և բարեկարգել այդ կառույցների տարածքներն ու արտաքին տեսքը:
Խորհրդակցության ընթացքում, որպես բնակչությանը հուզող խնդիր, վարչական շրջանների ղեկավարների կողմից բարձրացվել է հատկապես ամռան ամիսներին ջրամատակարարման գրաֆիկների խախտման հետ կապված հարցը:
Քաղաքապետը հանձնարարել է ուսումնասիրել հարցը, ընդգծելով, որ ընկերությունը պետք է բաժանորդների համար ապահովի որակյալ ծառայություն՝ պահպանելով ջրամատակարարման սահմանված ժամային գրաֆիկները:
