Գլխավոր ինտրիգը խորհրդարանական ընտրությունների ժամանակ կլինի իշխանության ներսում։ Այս մասին այսօր լրագրողների հետ հանդիպման ժամանակ ասաց գլոբալացման և տարածաշրջանային համագործակցության կենտրոնի ղեկավար Ստեփան Գրիգորյանը։
«Մրցակցությունը կգնա հիմնականում ՀՀԿ-ի ու ԲՀԿ-ի միջև, և ակնհայտ է, որ, եթե արդար ընտրություններ լինեն, մեծ տարբերությամբ կհաղթի ԲՀԿ-ն։ Ընդդիմություն-իշխանություն ֆորմատն էլ կաշխատի, բայց գլխավոր ինտրիգը, գլխավոր պայքարը կգնա իշխանության այդ երկու թևերի միջև։ ՀՀԿ-ն շատ ձայներ չի հավաքի, սա ակնհայտ է, ժողովուրդը չի տա։ Եթե շատ ձայներ լինեն, ուրեմն՝ խոշոր խախտումներով, և Հայաստանը նորից կընկնի մեծ պրեսի տակ և այլն»,- հայտարարեց Ս.Գրիգորյանը։
Ըստ քաղաքագետի՝ խորհրդարանում հայտնվելու հնարավորություն ունեն նաև «Ժառանգությունը» և ՀՅԴ-ն։
Հարցին, թե արդար ընտրությունների դեպքում հնարավոր չէ՞, որ ընդդիմությունը գա իշխանության, Ս.Գրիգորյանը պատասխանեց, թե նման հավանականություն չի տեսնում։ «Ես համարում եմ, որ Սերժ Սարգսյանի արտաքին քաղաքականությունը շատ հետաքրքիր էր, շատ կառուցողական, շատ հաջող էր, իսկ ներքին քաղաքականության մեջ նա լարվածությունը թուլացրեց, և չեմ կարծում, թե ժողովուրդը կգնա էքսպերիմենտների»,- հայտարարեց Ս.Գրիգորյանը։
