Լիբիայում աշխարհազորայինների վերահսկողության տակ գտնվող ճամբարներում ու բանտերում մոտ 5000 մարդ է պահվում: Այս մասին հայտնում է Associated Press-ը՝ հղում անելով Human Rights Watch իրավապաշտպան կազմակերպության տվյալներին:
Human Rights Watch-ի տվյալներով՝ Լիբիայում Մուամար Քադաֆիի ռեժիմի դեմ ապստամբության մեկնարկից բանտարկված է 8000 մարդ: Նրանցից միայն 3000-ն են գտնվում պաշտոնական իշխանությունների գործողության գոտում: Մյուսներն այն տարածքներում են, որոնք վերահսկում են իսլամիստ ապստամբները, որտեղ հասանելիություն չունեն արդարադատտության համակարգին և պարբերաբար բախվում են չարաշահումների:
Նրանցից շատերը պահվում են առանց դատի և քննության: Ապստամբների վերահսկողության տակ գտնվող բանտերում դիտվում է մահացության բարձր մակարդակ:
Իր ամենամյա զեկույցում իրավապաշտպան կազակերպությունը նշում է, որ Լիբիայի ժամանակավոր կառավարությունը բախվել է բազմաթիվ խնդիրների: Մասնավորապես, իշխանությունները ցույց են տվել պատերազմից հետո երկրում ծայր առած հարձակումների ու սպանությունների պատշաճ հետաքննություն անցկացնելու հարցում իրենց անկարողությունը:
