Այսօր լրագրողների հետ հանդիպման ժամանակ Կանաչների միության նախագահ Հակոբ Սանասարյանը, խոսելով ընդերքօգտագործման մասին նոր օրենքի վերաբերյալ ասաց, որ այն չի նախատեսում ոլորտից հարկման ավելացում: «Փաստորեն, հանքարդյունաբերությունը հանված է հարկային դաշտից, չեն հարկվում թափոնները՝ ինչպես նախկին, այնպես էլ նոր օրենքով»,- ասաց Հակոբ Սանասարյանը՝ հավելելով, որ հանքարդյունաբերության թափոնները նոր օրենքով համարվել են լցակույտեր, ինչը որևէ օրենսդրությամբ չի կարգավորվում:
Ըստ Սանասարյանի՝ մեր հանքարդյունաբերության ոլորտի պոչանքները համարվում են առաջին կարգի թափոն, որոնք ռադիոակտիվ տարրերից հետո համարվում են ամենավտանգավորն առողջության համար: Հ.Սանասարյանի խոսքով՝ միայն Քաջարանի հանքավայրի պոչանքների հարկման դեպքում պետությունը տարեկան 760 միլիոն դրամի լրացուցիչ հարկեր կստանար:
