Իսրայելական Cursorinfo կայքի փոխանցմամբ՝ Թուրքիան անսպասելի առաջարկ է արել Իսրայելին։ Թուրքիան Իսրայելին առաջարկել է համաձայնեցնել նախորդ տարվա մայիսի 31-ին գրանցված «Մավի Մարմարա»-ի միջադեպի ժամանակ իսրայելական հատուկջոկատայինների գործողությունների մասին ՄԱԿ-ի հետաքննիչ հանձնաժողովի բանաձևի տեքստը։
Նշվում է, թե Թուրքիան վախենում է, որ բանաձևի արդյունքով ինքը կմեղադրվի նախորդ տարի դեպի Իսրայելի կողմից ծովային շրջափակման ենթարկված Գազայի հատված «Ազատության նավատորմ» կազմակերպելու համար, ուստի ցանկանում է կարգավորել Իսրայելի հետ իր հարաբերությունները։
Հիշեցնենք, որ մայիսի կեսերին Թուրքիան մերժել էր «Մավի Մարմարա»-ի միջադեպի կապակցությամբ ՄԱԿ-ի հետաքննիչ խմբի պատրաստած զեկույցը՝ պատճառաբանելով, թե խումբը հարցին մոտեցել է իսրայելական տեսանկյունից և պատրաստել է իսրայելամետ զեկույց: Թուրքիան նաև սպառնացել էր դուրս գալ հետաքննիչ խմբի կազմից։
Վերջինս ստեղծվել է 2010 թվականի օգոստոսին։ Դրանում ներառված են Նոր Զելանդիայի նախկին վարչապետ, միջազգային ծովային իրավունքի փորձագետ Ջեֆրի Պալմերը, Իսրայելի նախկին արտգործնախարար Յոսեֆ Չեխանովերը և նախկին թուրք դիվանագետ Օզդեմ Սանբերկը:
