Վրացական GHN լրատվական գործակալության փոխանցմամբ՝ Կառնեգիի հիմնադրամի՝ Կովկասի հարցերով փորձագետ Թոմաս դե Վաալը foreign press-ին տված հարցազրույցում անդրադարձ է կատարել Վրաստանի ներքին զարգացումներին.
«Վրաստանը սիրում է իրեն ցուցադրել որպես մի երկիր, որն ունի մեծ և հաջող տնտեսություն, մինչդեռ իրականում նա դեռ չի կողմնորոշվել, թե իրական զարգանալու որ ուղին պետք է ընտրի։ Հնարավոր է՝ դուք տեսել եք Financial Times-ի, Economist-ի և CNN-ի գովազդային տեսագրությունները, որոնցում ասվում է, որ Վրաստանն աշխարհի թիվ 1 բարեփոխիչն է, սակայն նրանք, ովքեր գտնվել են Վրաստանում և ականատես են եղել իրողությանը, գիտեն, որ դա հիմնականում խելացի PR կապմանիա է։
Իրականում Վրաստանը տնտեսական մեծ խնդիրներ ունի։ Չնայած նրա գործադրած բարեփոխումներին՝ այդ երկիրը դեռևս շատ հեռու է այդ գործընթացն ավարտելուց։ Կան բազմաթիվ խնդիրներ։ Ինֆլյացիան կազմում է մոտ 14 տոկոս, սննդամթերքի ինֆլյացիան՝ 30 տոկոս։ Կառավարությունը գործնականում անուշադրության է մատնել գյուղատնտեսությունը։
Ժամանակին հարուստ գյուղատնտեսական երկիր Վրաստանն այսօր սննդամթերքի 80 տոկոսը ներկրում է արտերկրից։ Բացի այդ, բարձր է մնում գործազրկության ցուցանիշը, ինչը միայն Թբիլիսիում կազմում է մոտ 30 տոկոս։ Բանն այն է, որ Վրաստանում գրանցված որոշակի տնտեսական առաջընթացն առնչվել է տնտեսության այն ոլորտներին, ուր հնարավոր չէ ստեղծել շատ աշխատատեղեր»։
