Ստամբուլում անցկացվել են բողոքի նոր ակցիաներ, որոնք ոստիկանությունը խստությամբ ցրել է: Բողոքի ակցիաների առիթը օրինագիծն էր, որը նախատեսում է համացանցում ներմուծել գրաքննություն: Իրավիճակն իշխանությունների համար գնալով ավելի ու ավելի է լարվում, իսկ փորձագետները հայտնում են «Արդարություն և զարգացում» կուսակցության իսլամիստների կառավարման 11 տարիների լրջագույն ճգնաժամի մասին:
Այդ ամենն առավել տհաճ է վարչապետ Ռեջեփ Թայիփ Էրդողանի համար, քանի որ մոտենում են ընտրությունները՝ մարտին՝ մունիցիպալ, օգոստոսին՝ նախագահական: Երկրում տիրող ճգնաժամը կարող է ժողովրդականությունը կորցնող վարչապետին ստիպել հրաժարվել նախագահ Աբդուլլահ Գյուլի հետ տանդեմում «փոխատեղումից» և չառաջադրել իր թեկնածությունն ընտրություններում: Այս մասին հայտնում է Kommersant-ը:
Տեղական ընտրությունները, որոնցից մեծապես կախված է իշխող կուսակցության ապագան, կանցկացվեն մարտի 30-ին: «Ստամբուլը կորցնելը Էրդողանի համար նշանակում է կորցնել ողջ երկիրը»,- սիրում են կրկնել քաղաքի բնակիչները, ովքեր 20 տարի առաջ ներկայիս վարչապետին ընտրել էին իրենց քաղաքապետ:
Օրերս Milliyet-ում տպագրված սոցհարցումների արդյունքներով՝ ընդդիմադիր Ժողովրդա-հանրապետական կուսակցության թեկնածու Մուստաֆա Սարըգյուլը կրճատել է տարբերությունը երրորդ ժամկետում քաղաքապետ առաջադրվել պատրաստվող իշխող կուսակցության թեկնածու Կադիր Թոփբաշի համեմատ՝ հասցնելով 9 տոկոսի:
Իրավիճակը Ստամբուլում կարող է ցանկացած պահի փոխվել հօգուտ ընդդիմության՝ կառավարությունում նորանոր սկանդալների լույսի ներքո:
Իշխանությունները Մուստաֆայի դեմ արդեն ձեռնարկել են կանխարգելիչ միջոցառումներ: Անցած շաբաթվա վերջին նրա գույքի վրա կալանք է դրվել: Նրան մեղադրել են 1998-ին վարկի 3.5 մլն դոլարի մասը չվճարելու մեջ: Նա հերքել է մեղադրանքները՝ անվանելով դրանք խուճապահար իշխանության շահարկումներ:
«Դուք վախենալու ոչինչ չունեք,- ասել է նա իր կողմնակիցներին Աթաքեյ շրջանում հանրահավաքի ժամանակ:- «Արդարություն և զարգացում» կուսակցության աստղը մայր է մտնում, իսկ մերը՝ հակառակը՝ ծագում»: Թեկնածուն վստահ է, որ կառավարությունը չի կարող հաղթահարել հակակոռուպցիոն գաղտնազերծումների վերջին ալիքը:
Ըստ սոցհարցման՝ այսօր իշխող կուսակցությունը զիջում է ընդդիմությանը 10 խոշոր քաղաքներում, այդ թվում՝ Իզմիրում, Անթալիայում, Ադանայում, Մերսինում, Էսքիշեհիրում:
«Եթե այսօր խորհրդարանական ընտրություններ անցկացվեին, Էրդողանը կպարտվեր»,- Kommersant-ի հետ զրույցում ասել է Ստամբուլի համալսարանի քաղաքագիտության պրոֆեսոր Հաքան Գյունեշը:
Փորձագետը ենթադրել է, որ իրադարձությունները երկրում կարող են ընթանալ անկանխատեսելի սցենարով՝ ընդհուպ մինչև այն, որ վարչապետը որոշում ընդունի անցկացնել արտահերթ տեղական, նախագահական և 2015-ին ծրագրված խորհրդարանական ընտրությունները: «Էրդողանը կարող է սկսել պարտադրել իրադարձությունները, քանի որ վախենում է, որ կոռուպցիոն մեղադրանքները կարող են առաջադրվել անձամբ իր դեմ»,- կարծում է փորձագետը:
Փորձագետները հիշեցնում են՝ ընտրություններում մասնակցությունից հրաժարվելու համար վարչապետը մեկ այլ ծանրակշիռ փաստարկ ունի: Մեջլիսում երկու տարի տևած բուռն քննարկումներից հետո այդպես էլ չի ընդունվել նոր Սահմանադրության նախագիծը, որը պետք է Թուրքիան խորհրդարանական հանրապետությունից վերածեր նախագահականի: «Դա նշանակում է, որ Էրդողանին այժմ ավելի շահավետ է մնալ երրորդ վարչապետական ժամկետում»,- ասում է Հաքան Գյունեշը:
