Սիրիական ընդդիմության զինված խմբավորումների ներկայացուցիչները, որոնք Սիրիայի տարածքում պայքար են մղում կառավարական ուժերի դեմ, ինչպես սպասվում է, կընդգրկվեն «Ժնև-2» համաժողովի պատվիրակության կազմում: Այս մասին Ստամբուլում մամլո ասուլիսի ժամանակ հայտնել է ընդդիմադիր և հեղափոխական ուժերի ազգային կոալիցիայի պաշտոնական ներկայացուցիչ Լուայ Սաֆին: Նրա խոսքով՝ դեռ անհայտ է, թե որն է լինելու իրենց դերը, սակայն իրենք պետք է մասնակցեն խորհրդակցություններին և որոշումների կայացմանը:
Սաֆին նշել է, որ մոտ ժամանակներս Սիրիայի ազգային կոալիցիայի ղեկավարությունը կրկին կհավաքվի՝ քննարկելու խաղաղ համաժողովի մասնակցության հետ կապված հարցեր: Կքննարկվեն նաև պատվիրակության կազմին առնչվող հարցեր:
Ավելի վաղ Ազգային կոալիցիայի առաջնորդ Ահմեդ Ասի Ալ-Ջարբան հույս է հայտնել, որ Շվեյցարիայի համաժողովը կստիպի Ասադին կանգնել դատարանի առաջ:
«Համաժողովին մենք կմասնակցնեք որպես ահաբեկչության դեմ պայքարողներ, որպեսզի ազատենք Սիրիան այս հանցագործից»,-ասել է Ալ-Ջարբան՝ հավելելով, որ Դամասկոսի համար «Ժնև-2»-ը չի լինի իրավիճակից ելք գտնելու հեշտ միջոց:
Երեկ Ստամբուլում տեղի է ունեցել Ազգային կոալիցիայի գլխավոր ասամբլեայի նիստ, որի ժամանակ տեղի է ունեցել համաժողովին մասնակցելու հարցով քվեարկություն: 73 անդամներից կողմ են քվեարկել 58-ը, դեմ՝ 14-ը, ձեռնպահ՝ 2-ը: Այս մասին հայտնում է ITAR-TASS-ը:
«Ժնև 2»-ին մասնակցելու Սիրիայի ազգային կոալիցիայի որոշումը ողջունել են ՄԱԿ-ի գլխավոր քարտուղար Պան Գի Մունը, ԱՄՆ պետքարտուղար Ջոն Քերին, ինչպես նաև եվրոպական դիվանագիտության ղեկավար Քեթրին Էշթոնը:
«Ժնև-2»-ը պետք է բացվի նախարարական մակարդակով հանդիպմամբ՝ հունվարի 22-ին, Մոնտրեում:
