Արդեն պարզ է, որ արտահերթ ընտրությունը կանցկացվի հին օրենսգրքով: Ազգային ժողովում այսօր երկրորդ անգամ տապալվեց նոր օրենսգրքի ընդունումը, որով նախատեսվում էր չեղարկել ռեյտինգային ընտրակարգն ու անցնել այսպես ասած մաքուր համամասնականի: Այդպիսով, ընտրությունը կլինի ռեյտինգային ընտրակարգով: Պետք է սակայն խոստովանել, որ այստեղ ընտրակարգի դերակատարությունը կամ նշանակությունը փոքր ինչ չափազանցված է, երբ խոսվում է խորհրդարանի այսպես ասած քաղաքական բնույթի մասին: Ինչո՞ւ․ փորձելով պատասխանել այս և այլ հարցերի՝ թեմայի շուրջ «Առաջին լրատվական»- ի հետ քննարկմանը մասնակցեցին ԱԺ «Ծառուկյան» խմբակցության պատգամավոր Սերգեյ Բագրատյանը, ԱԺ «Ելք» խմբակցության պատգամավոր Հովիկ Աղազարյանը, «Իրազեկ քաղաքացիների միավորում» ՀԿ նախագահ Դանիել Իոաննիսյանը:
«ՀՀԿ-ին ձեռնտու չէր նոր Ընտրական օրենսգրքով գնալ ընտրությունների, որովհետև միգուցե իրենց հաշվարկներով նոր ԸՕ-ով իրենց հնարավորություններն առաջիկա խորհրդարանական ընտրություններում ավելի քիչ կլինեին: Նրանք ամեն ինչ արեցին, որպեսզի ԸՕ նոր օրինագիծը չընդունվի»,- նշեց Հ. Աղազարյանը:
Դ. Իոաննիսյանի դիտարկմամբ՝ ՀՅԴ խմբակցության 2 պատգամավոր չէին եկել նիստին, և քանի որ ընդամենը մեկ քվե չբավականացրեց օրինագծի ընդունմանը, ապա դա էական էր:
«Նոր ԸՕ-ն այսօր տապալվեց: Նոր ԸՕ ընդունումը հեղափոխության հիմնական հանգուցային քայլերից մեկն էր, այն պետք է լիներ վարչապետի և կառավարության առաջնահերթությունների շարքում… Եվ երբ որ իրատեսկան դարձավ ԸՕ տապալման վտանգը, ազնիվ կլիներ, եթե վարչապետը դիմեր ժողովրդի աջակցությանն ու ճնշեր ԱԺ-ին»,- նշեց Դ. Իոաննիսյանը:
Քննարկման մասնակիցների դիտարկմամբ՝ խորհրդարանական ընտրությունները դեկտեմբերին անցկացնելու մտադրությունը վտանգեց նոր Ընտրական օրեսգրքի ընդունումը:
«ՀՀԿ-ն տապալեց Հայաստանի ընտրությունների ժողովրդավարացումը և էապես գցեց գալիք խորհրդարանի որակը»,- ընդգծեց Դ. Իոաննիսյանը:
Մանրամասն՝ տեսանյութում:
