Նախօրեին խորհրդարանում ունեցած գործնականում ծրագրային ելույթում վարչապետ Նիկոլ Փաշինյանը ուշագրավ և բավականին ինտրիգային հայտարարություն արեց՝ խոսելով Մարտի 1-ի գործը բոլոր անկյուններով բացահայտելու մասին: Նա հայտարարեց, թե կոչ է անում հոգեբանորեն պատրաստվել այնպիսի բաներ լսելու, որը հեշտ չի լինելու: Այդ իմաստով Նիկոլ Փաշինյանի հայտարարությունը խիստ հատկանշական է, որովհետև հարց է ծագում, թե ինչ պետք է լսի հանրությունը, որ չի լսել մինչ այսօր: Թվում է, որ հասարակությունն առ այսօր սպասում է լսել միայն Մարտի 1-ի գործով արդարացի դատավճիռ, որը կվերաբերի այդ օրերին իշխանության այն պատասխանատուներին, որոնք չպետք է թույլ տային բռնություն հանրության հանդեպ և դրա հետևանքով մարդասպանություն Երևանի կենտրոնում, բայց թույլ են տվել, իսկ գուցե նաև անմիջական հրաման են տվել հանրությանը ճնշելու հարցում:
«Մարտի 1-ի գործի քննությունը շարունակվում է, և կասկած չկա, որ այդ ուղղությամբ էական արդյունքներ են արձանագրվելու»,- այս մասին թեմայի շուրջ «Առաջին լրատվական»- ի հետ զրույցում ասաց լրագրող Կարպիս Փաշոյանը:
«Մարտի 1-ն առանձնապես ծանր հանցագործություն էր մեր ժողովրդի, մեր պետականության և բանակի նկատմամբ: Չենք կարող մոռանալ այն վշտի և ցավի հիշողությունը, որ Քոչարյանի ռեժիմը պատճառեց մեզ գարնան առաջին օրը,- նշեց ազատամարտիկ, ՀԱԿ վարչության անդամ Վարդան Մալխասյանը: -Ցանկացած նոր իշխանություն, եթե նախորդների առանձնապես ծանր հանցագործությունները խորապես չի բացահայտում և մեղավորներին խստագույնս չի պատժում, նախորդներից ավելի փչացած կդառնա: Մեր ժողովուրդն արդարության կարոտ է: Առանց Հոկտեմբերի 27-ի և Մարտի 1-ի բացահայտման նոր էջից չենք կարող սկսել»:
Մանրամասն՝ տեսանյութում: