Բարձրաստիճան պաշտոնյաների մեծ մասը ընտրությունների ժամանակ ընդգրկվում են իրենց կուսակցությունների համամասնական ցուցակներում, և ընտրություններից առաջ պարտավոր են իրենց գույքի և եկամուտների մասին հայտարարագրեր ներկայացնել Կենտրոնական ընտրական հանձնաժողով: Սակայն վերջին տարիներին այդ պաշտոնյաները պարտավոր են արդեն յուրաքանչյուր տարի նմանատիպ հայտարարագրեր ներկայացնել Բարձրաստիճան պաշտոնյաների էթիկայի հանձնաժողով:
Հաճախ բավականին հետաքրքիր, նույնիսկ աշխատատար է այդ հայտարարագրերի ուսումնասիրությունը, քանի որ այդ պաշտոնյաներից ոմանք ունեն աստղաբաշխական կարողություն: Ու քանի որ հայ հանրությանը հայտնի գերհարուստներից մեկը «Բարգավաճ Հայաստան» կուսակցության նախագահ Գագիկ Ծառուկյանն է, մեր առաջին անդրադարձը վերաբերում է նրան: Իհարկե, մեր հաջորդ հրապարակումներում կանդրադառնանք թե ԲՀԿ-ի, թե Հանրապետական և թե այլ կուսակցությունների անդամ պաշտոնյաների կարողություններին:
Եվ այսպես, Գ. Ծառուկյանի հայտարարագրերում բավականին հետաքրքիր տեղ էր զբաղեցնում 8 մլն դրամը գերազանցող կահույքի և թանկարժեք զարդերի բաժինը: Այս հատվածում ԲՀԿ ղեկավարը գրանցել էր 2 ճաշասենյակի և 8 ննջասենյակի կահույք: Ճաշասենյակներից մեկի կահույքն արժեր 127 հազար 820 եվրո, մյուսը՝ 42.800 եվրո: Իսկ 8 ննջասենյակների կահույքը միասին արժեր ավելի քան 640 հազար եվրո: Գ. Ծառուկյանը հայտարարագրել է նաև ձեռքի 3 գերթանկարժեք ժամացույց և նմանատիպ մատանի: Ադամանդե քարերով ու ոսկյա շղթայով այդ ժամացույցներից երկուսն, օրինակ, արժեն 500-հազարական դոլար, մյուսը՝ 300.000 դոլար: Ադամանդե քարով մատանիներից մեկն արժե 3 մլն դոլար, երկրորդը՝ 1 մլն դոլար, իսկ երրորդը՝ 700.000 դոլար: Այսինքն` ԲՀԿ ղեկավարն ունի ավելի քան 810 հազար եվրո արժողությամբ շքեղ կահույք և 6 մլն դոլար արժողությամբ թանկարժեք ոսկեղեն:
Իհարկե, ԲՀԿ ղեկավարի տանը բազմաթիվ այլ մանր-մունր, ասենք` կտորը 10-15 հազար դոլար արժեցող ոսկեղեն կամ կահույք էլ կլինի, սակայն այս դեպքում գրանցման ենթակա են միայն թանկարժեք այն ապրանքները, որոնց արժեքը գերազանցում է 8 մլն դրամը: Նրա` 2011թ. հայտարարագրում նշված էին նաև 7 շքեղ մեքենաներ՝ BMW X-5, Տոյոտա-Պրադո V-6, Ջիպ Վրանգլեր P 6-4, Ռոլս-Ռոյս B 12-6, Նիսսան Պատրուլ, Ռոլս-Ռոյս կուպե ֆանտոմ և Ռենջ Ռովեր սպորտ 4,4: Այս մեքենաների գները նշված չեն, բայց վստահաբար կարելի է ասել, որ դրանք բոլորը միասին կարժենան առնվազն 5 մլն դոլար:
Գ. Ծառուկյանի ու նրա կնոջ՝ Ջավահիր Ծառուկյանի հայտարարագրերում նշված էին հարյուրավոր միլիոնների հասնող բաժնետոմսեր ու դրամական միջոցներ: Դրանց մեկ առ մեկ ծանոթանալը գլխապտույտ առաջացնող ուսումնասիրություն էր, և հնարավոր չէր այդքան հսկայական հարստությանը հետևելը միանգամից ընկալել, ուստի մյուս մասն էլ կներկայացվի հաջորդ հրապարակման մեջ:
Լուսանկարը` PanARMENIAN Photo-ի
