ԱՄՆ Օհայո նահանգում մահվան դատապարտված Դենիս ՄաքՀուայրը մահապատժի է ենթարկվել ներարկման միջոցով: Այս անգամ կիրառվել է նոր մահացու «կոկտեյլ»:
Մահապատիժը տեղի է ունեցել Օհայո նահանգի Հարավային բանտում՝ այն բանից հետո, երբ դատավորը մերժել է ՄաքՀուայրի փաստաբանների բողոքարկումը: Նրանք կոչ էին անում ուշադրություն դարձնել մարդասպանի ծանր մանկությանը: Դատարանը, սակայն, չի բավարարել նրանց խնդրանքը, և մահապատիժը տեղի է ունեցել:
Ամերիկյան ԶԼՄ-ների տվյալներով՝ ՄաքՀուայրի մահացու ներարկումը բաղկացած է եղել հանգստացնող միդազոլամ և ցավազրկող հիդրոմորֆին նյութերից: Ներարկման նման բաղադրությունն առաջին անգամ է օգտագործվել:
Դենիս ՄաքՀուայրը բռնաբարել և սպանել էր 22-ամյա Ջոյ Սթյուարտին, որը 30 շաբաթական հղի էր: Հանցագործությունից հետո նա աղջկան թաքցրել էր անտառում, որտեղ նրան որոշ ժամանակ անց գտել էին զբոսաշրջիկները:
